ЕГИ́ПЕТЧЕ чедип келгеш, Моисе́й шупту хуулгаазыннар дугайында бодунуң дуңмазы Ааро́нга чугаалап берген. Моисе́й биле Ааро́н ол хуулгаазыннарны изра́ильчилерге көргүзерге, Иегова олар-биле деп, бүгү чон бүзүрей берген.

Оон Моисе́й биле Ааро́н фарао́нче чорупканнар. ‘Изра́ильдиң Бурганы Иегова чугаалап тур: ‘Мээң чонумну ховуже үш хүн дургузунда меңээ чүдүүр кылдыр, салып көрем’,— деп чарлааннар. Аңаа фарао́н: ‘Иеговага мен бүзүревес мен. Ынчангаш Изра́ильди салыр дивейн тур мен’,— деп харыылаан.

Иеговага чүдүүр дээш, чон ажылын соңгаарладыр дээрге, фарао́н хорадай берген. Ынчангаш оларны оон-даа хөй ажылдаарын ол албадаан. Ындыг багай хамаарылга дээш, изра́ильчилер Моисе́йни буруудаткан, ынчангаш бо чүүл Моисе́йни дыка муңгараткан. Ынчалза-даа Иегова Моисе́йни оожургаткан. ‘Мээң чонумну салыр кылдыр фарао́нну албадаптар мен’,— деп Иегова бүзүреткен.

Моисе́й биле Ааро́н фарао́нга катап чедип келгеннер. Бо удаада олар хуулгаазын кылганнар. Ааро́н даянгыыжын октаптарга, ол улуг чылан болуп хуула берген. Ынчалза-даа фарао́ннуң мерген угаанныглары база даянгыыштарын октаптарга, олар чыланнар болуп хуула бергеннер. Ынчалза-даа чүл ол! Ааро́ннуң чыланы мерген угаанныгларның чыланнарын ажырыпкан. Дөмей-ле фарао́н изра́ильчилерни салыр күзели чок.

Ынчан Иегованың фарао́нну кезедиптер үези келген. Канчаар ону кылганын, билир сен бе? Ол Еги́петче 10 шаажы чоруткан — 10 улуг халапты.

Шаажы бүрүзүнүң соонда-ла фарао́н Моисе́йни кыйгыртып алгаш: ‘Бо шаажыны чайладывыт, оон Изра́ильди салыптар мен’,— деп чаннып турган. Ынчалза-даа шаажы төнген санында-ла, фарао́н шиитпирин өскертип турган. Ол биеэги хевээр чонну салбайн турган. Ынчалза-даа 10-гу шаажы соонда, сөөлүнде кээп, фарао́н изра́ильчилерни салыпкан.

Ол чүү деп шаажылар болганыл, билир сен бе? Дараазында арынны ажыдывыт, оон билип алыр бис.