Musi Mushe a tshi vhuelela Egipita, a vhudza mukomana wawe Aroni zwoṱhe nga ha vhuṱolo. Musi Mushe na Aroni vha tshi sumbedza Vhaisiraele vhuṱolo uvhu, vhathu vha tenda uri Yehova o vha e navho.

Zwenezwo Mushe na Aroni vha ya u vhona Farao. Vha mu vhudza: ‘Yehova Mudzimu wa Isiraele u ri, “Litsha vhathu vhanga vha ṱuwe maḓuvha mararu, uri vha kone u nthabela sogani.”’ Fhedzi Farao a fhindula: À thi tendi Yehova. Nahone a thi nga tendi Isiraele a tshi ṱuwa.’

Farao o vha o sinyuwa, ngauri vhathu vho ṱoḓa tshifhinga tsha u sa vha mushumoni uri vha rabele Yehova. Ngauralo a vha kombetshedza u shumesa. Vhaisiraele vha pomoka Mushe nga nḓila ye vha vha vho farwa luvhi, nahone Mushe a ṱungufhala. Fhedzi Yehova a ri: ‘Ndi ḓo ita uri Farao a litshe vhathu vhanga vha ṱuwe.’

Mushe na Aroni vha dovha vha ya u vhona Farao. Itshi tshifhinga vha ita vhuṱolo. Aroni a posa lubaḓa fhasi, lwa vha ṋowa khulu. Fhedzi vhaṱali vha Farao na vhone vha posa mbaḓa fhasi, ha bvelela dziṋowa. Fhedzi, vhonani! Ṋowa ya Aroni i khou ḽa ṋowa dza vhaṱali. Fhedzi Farao a si tende Vhaisiraele vha tshi ṱuwa.

Ha ḓa tshifhinga tsha uri Yehova a funze Farao ngudo. Ni a ḓivha uri o zwi itisa hani? Ho vha hu nga u ḓisa dziṱhamu dza 10, kana dzikhombo khulu, Egipita.

Nga murahu ha vhunzhi ha dziṱhamu, Farao o vhidza Mushe a ri: ‘Imisa ṱhamu, ndi ḓo litsha Isiraele a ṱuwa.’ Fhedzi musi ṱhamu i tshi ima, Farao o vha a tshi shandula ngelelo yawe. O vha a sa litshi vhathu vha ṱuwa. Fhedzi, nga murahu ha ṱhamu ya vhu-10, Farao a ṱuwisa Vhaisiraele.

Ni a ḓivha iṅwe na iṅwe ya ṱhamu dza 10? Vulani siaṱari ri gude nga hadzo.

Ekisodo 4:27-31; 5:1-23; 6:1-13, 26-30; 7:1-13.