Mwaha 31: Moise Ni Aroni Anikumana Ni Farawoo
VAAVO Moise vanitthikela awe wEjiitu, owo aahimuleela munnawe Aroni sotheene voohimya sa mitikiniho. Nto vaavo Moise ni Aroni vaawoonihenrya aya anaIsarayeli mitikiniho iya, atthu otheene yaahikupali wira Yehova aari n’awo.
Nuumala vo Moise ni Aroni yaahirowa okumana ni Farawoo. Awo yaahimuleela wira: ‘Yehova Muluku a Isarayeli onihimya so, “Mwaahiye atthu aka arowee mmahiku mararuu, siiso awo anoowerya okikokhorela miyo mothakoni.”’ Masi Farawoo aahaakhula wira: ‘Nkimmukupali Yehova. Nto miyo nkinrowa omuhiya Isarayeli orowaka.’
Farawoo aahinanariwa, okhala wira atthu yaaphavela okathi woomumulela muteko wira amukokhorele Yehova. Siiso owo aahaakhanyererya awosa wira avareke muteko moohaawelexa ovikana khalai. AnaIsarayeli yaahimureya nthowa Moise mwaha wa othokoreriwa waya mootakhala, nto Moise aahiriipiwa murima. Masi Yehova aahimuleela wira ohixanke. ‘Kinrowa omwiiriha Farawoo waahiya atthu aka orowa,’ aahihimya Yehova.
Moise ni Aroni yaahirowa-tho okumana ni Farawoo. Ekwaha ela awo yaahipaka mutikiniho. Aroni aahimurihela vathii ttootto awe, nto aahithatuwa enowa yuulupale. Masi anamasuwela a Farawoo nave-tho yaahaarihela vathii a ttootto aya, nto saahikhuma inowa. Masi, nkawehani! Enowa ya Aroni enimirya inowa sa anamasuwela. Nlelo Farawoo khaaphavela waahiya anaIsarayeli orowa.
Siiso okathi waahiphiya wira Yehova omusomihe etthu Farawoo. Nyuwo munnisuwela moota siiralya awe ela? Aahipaka ela mwa oruuha ihukhumu 10, aahiiso mixankiho suulupale, wEjiitu.
Vattuli va ihukhumu sinceene, Farawoo aahimwiihana Moise, nto aahimuleela wira: ‘Mmaalihe ehukhumu, nto kinrowa omuhiya Isarayeli wira orowee.’ Masi vaavo ehukhumu vaarowa aya omaala, Farawoo aarowa orukunuxa mupuwelelo awe. Owo khaarowa waahiya atthu arowaka. Masi, wanikisa waya, nuumala ehukhumu ya 10, Farawoo aahiweemererya anaIsarayeli okhuma.
Nyuwo munnisuwela khuta emosaa sa ihukhumu iyo 10? Mukhunule epaaxina nto nrowee niixutte iyo.
Okhuma 4:27-31; 5:1-23; 6:1-13, 26-30; 7:1-13.
Makoho
- Yookhumela xeeni yaakhanle wa anaIsarayeli mmitikiniho seiye Moise ni Aroni saapanke aya?
- Moise ni Aroni aamuleelale exeeni Farawoo, nto Farawoo aakhunle sai?
- Ntoko sooniheriwa aya valataratoni va, exeeni yiiranen’ye vaavo Aroni vaamurihenlya awe vathii ttootto awe?
- Moota xeeni Yehova saamusominha awe Farawoo, nto Farawoo aakhulenle sai?
- Exeeni yiiranen’ye nuumala ehukhumu ya namuloko?
Makoho oowuncererya
- Mmusome Okhuma 4:27-31 ni 5:1-23.
Aataphulela exeeni Farawoo vaavo vaahimmya awe wira: “Nkimmusuwela Yehova”? (Okhum 5:2, NM; 1 Sam. 2:12; aRom. 1:21)
- Mmusome Okhuma 6:1-13, 26-30.
Mmukhalelo xeeni Yehova vahiisuwelinha awe wa Abrahamu, Isakhi ni Yakobe? (Okhum 3:13, 14; 6:3; Maph 12:8)
Nnoonela sai osuwela wira Yehova nlelo aahinvarihela muteko Moise, hataa Moise iixoonale okhala oohiphwanelela mmuteko awe ole woothanleliwa? (Okhum 6:12, 30; Luk 21:13-15)
- Mmusome Okhuma 7:1-13.
Vaavo Moise ni Aroni vaalavunly’aya moolipa murima sa soophukela sa Yehova wa Farawoo, mathipelo xeeni yaatikithenrya aya wa arumeyi a Muluku olelo? (Okhum 7:2, 3, 6; Mit 4:29-31)
Moota xeeni Yehova soonihenrya awe wunnuwa wawe vasuluu va amuluku a wEjiitu? (Okhum 7:12; 1 Wah 29:12)
