MUUSEE Gibxxe gakkido wode, ba beˈido malaatata ubbaa ba ishaa Aaroonassi yootiis. Muuseenne Aarooni he malaatata Israaˈeeleta bessido wode, asay ubbay Yihooway etaara deˈiyoogaa ammaniis.

Hegaappe simmin, Muuseenne Aarooni Paaroonakko biidosona. Eti ayyo: ‘Israaˈeela Xoossaa Yihooway, “Eti heezzu gallassa ogiyaa biidi bazzuwan taayyo goynnanaadan ta asaa yedda” yaagees’ yaagidosona. SHin Paarooni: ‘Taani Yihoowa ammanikke; Israaˈeeletakka yeddikke’ yaagiis.

Asay Yihoowayyo goynnanau giidi, bantta oosuwappe shemppanau oychchido gishshau, Paarooni yiillotiis. Hegaa gishshau, kaseegaappekka deexo oosuwaa eti oottanaadan wolqqanttiis. Israaˈeeleti bantta deˈoy haa iitidoogau Muusa gaaso oottidosona; Muuseekka hegan azzaniis. SHin i hirggenna mala Yihooway ayyo yootiis. Yihooway: ‘Paarooni ta asaa yeddanaadan ta oottana’ yaagiis.

Muuseenne Aarooni Paaroonaara gayttanau simmidi biidosona. He wode eti issi malaataa bessidosona. Aarooni ba gatimaa saˈan olin, wogga shooshsha kiyiis. SHin Paaroona shareechchotikka bantta gatimaa gatimaa saˈan olin, eta gatimaykka shooshsha kiyiis. SHin, Aaroona shooshshay he shareechchotu shooshshata miyaagaa beˈa! Paarooni haˈˈikka Israaˈeeleta yeddibeenna.

Yaatiyo gishshau, Yihooway Paaroonayyo timirtte immiyo wodee gakkiis. I hegaa waati oottidaakko eray? Gibxxetu bolli 10⁠u boshaa, woykko wolqqaama metuwaa ehiyoogaana.

Daro boshati gakki simmin, Paarooni Muusekko kiittidi: ‘Ha boshaa teqqa; yaatikko ta Israaˈeeleta yeddana’ yaagiis. SHin boshay eqqiyo wodiyan, Paarooni ba qofaa laammibayees. Asaa yeddibeenna. Wurssettan, 10⁠tta boshay gakki simmin, Paarooni Israaˈeeleta yeddiis.

He 10⁠u boshaa ubbaa eray? Kaalliya sinttaa ne kessin etabaa ane tamaaroos.