HAN binalik hi Moises ha Ehipto, iginsumat niya ha iya bugto nga hi Aaron an mga milagro. Ngan han iginpakita nira Moises ngan Aaron ini nga mga milagro ha mga Israelita, tinoo an mga Israelita nga ginsugo hira ni Jehova.

Katapos, nakigkita hira Moises ngan Aaron kan Paraon. Nagsiring hira ha iya: ‘Hi Jehova nga Dios han Israel nasiring, “Palakta an akon katawohan hin tulo ka adlaw basi magsingba ha akon didto ha kamingawan.”’ Kondi binaton hi Paraon: ‘Diri ako natoo kan Jehova. Ngan diri ko palalakton an Israel.’

Nasina hi Paraon tungod kay karuyag han mga Israelita nga magbakasyon basi magsingba kan Jehova. Salit ginpatrabaho niya an mga Israelita hin mas makuri. Tungod hini, ginbasol nira hi Moises, salit nasubo hiya. Kondi nagsiring ha iya hi Jehova nga diri mabaraka. ‘Susugoon ko hi Paraon nga palakton an akon katawohan,’ siring ni Jehova.

Nakigkita utro kan Paraon hira Moises ngan Aaron. Hini nga higayon, nagbuhat hira hin milagro. Iginlabog ni Aaron an iya tungkod, ngan nagin daku nga halas ito. Pero iginlabog liwat han mga mahiko ni Paraon an ira mga tungkod, ngan nagin mga halas liwat ito. Kondi, kitaa! Ginkakaon han halas ni Aaron an mga halas han mga mahiko. Pero waray la gihapon palakta ni Paraon an mga Israelita.

Salit inabot an panahon nga kinahanglan na tutdoan ni Jehova hin leksyon hi Paraon. Maaram ka ba kon ano an Iya ginbuhat? Nagpadapat Hiya ha Ehipto hin 10 nga peste, o kakurian.

Katapos han pipira nga peste, ginpatawag ni Paraon hi Moises, ngan nagsiring: ‘Paundanga an peste ngan palalakton ko an Israel.’ Pero kon naundang an peste, nagbabag-o an hunahuna ni Paraon. Diri niya ginpapalakat an mga Israelita. Kondi katapos han ika-10 nga peste, ginpalakat hira ni Paraon.

Maaram ka ba kon ano an 10 nga peste? Paklia an sunod nga pahina ngan hibabaroan naton ito.