MUSA paŵawujile ku Eguputo, ŵamsalile Aloni mkulugwe yakusimonjesya yosope yila. Sambano Musa ni Aloni paŵalosisye Ayisalayeli yakusimonjesyayi, ŵandu wosopewo ŵakulupilile kuti Yehofa ŵaliji ni jemanjajo.

Kaneko Musa ni Aloni ŵapite kukuwonegana ni Falao. Ŵamsalile Falao kuti: ‘Yehofa Mlungu jwa Ayisalayeli aŵecete kuti, “Mwakunde ŵandu ŵangu ajawule kwa masiku gatatu, kuti akanambile une mu cipululu.”’ Nambo Falao ŵajanjile kuti: ‘Une jwangakulupilila Yehofa. Soni ngingunda kuti Ayisalayeli ajawule.’

Falao ŵatumbile, ligongo ŵamanyililaga kuti ŵanduwo ŵasakaga kupumula ku masengo, kuti akalambile Yehofa. Ni ŵakanganicisye kuti akamuleje masengo mnope kupundana nikalakose. Sambano Ayisalayeli ŵamjamwice Musa ligongo lya yindu yakusakala yele Aeguputo ŵatendelaga, ni Musa camkamwile canasa. Nambo Yehofa ŵamsalile kuti akadandawula. Yehofa ŵaŵecete kuti, ‘Cinjimtendekasya Falao kwakunda ŵandu ŵangu kwawula.’

Musa ni Aloni ŵapitesoni kwa Falao. Pandaŵiji ŵatesile cakusimonjesya. Aloni ŵaponyisye pasi simbo jakwe, ni jasyucile lijoka lyekulungwa. Nombe nawo ŵandu ŵalunda ŵa Falao ŵaponyisye pasi simbo syawo, soni majoka gawonecele. Nambo, alole! Lijoka lya Aloni likulya majoka ga ŵandu ŵalunda ŵala. Nambope Falao nganiŵakunda Ayisalayeli kwawula.

Sambano jakwanile ndaŵi jakuti Yehofa amjiganye lijiganyo Falao. Ana akumanyilila mwaŵatendele? Ŵatesile yeleyi mwa kuyikasya milili 10, kapena yipwetesi yekulungwa, pa ŵandu ŵa ku Eguputo.

Pambesi pa mlili wuliwose, Falao ŵamtumilaga utenga Musa, acitiji: ‘Mlekasye mliliwu, ni cinakunde Ayisalayeli kwawula.’ Nambo pawalesile mliliwo Falao ŵasindaga nganisyo syakwe. Nganiŵakundaga ŵanduwo kwawula.Nambo pambesi pa mlili wa 10, Falao ŵakundile Ayisalayeli kwawula.

Ana akujimanyilila milili 10 jeleji? Awunukule kusyetoku kuti alijiganye yakwamba mililiji.