Historia 31

Moisés ne Aarón riguuyacaʼ Faraón

ORA bibiguetaʼ Moisés Egipto la? gúdxibe bíʼchibe Aarón de ca milagru que. Ne ora Moisés ne Aarón biluíʼcabe ca milagru riʼ ca israelita que la? guiracaʼ biʼniʼ crecaʼ de que Jiobá nuuné laacabe.

Óraque Moisés ne Aarón yeguuyacabe Faraón ne gúdxicabe laa: Jiobá, Dios stiʼ ca israelita na: Bidii lugar cheʼ binni xquidxeʼ chonna gubidxa lu desiertu para guni adorárcabe naa. Peru Faraón guníʼ: Naa qué runeʼ crediaʼ Jiobá. Qué zudiediaʼ lugar cheʼ ca israelita riʼ.

Faraón bidxiichi, purtiʼ nuucabe guicaacabe dxi dxiiñaʼ para chiguni adorárcabe Jiobá. Pur ngue bicaabe laacaʼ gúnicaʼ dxiiñaʼ jma nadipaʼ. Ca israelita que bigaanicabe donda Moisés pur modo cayuninácabe laacaʼ, ne Moisés biuu triste. Peru Jiobá gudxi laabe cadi chuʼbe xizaa. Naa zucaa Faraón gundaa ca binni xquidxeʼ, na Jiobá.

Moisés ne Aarón yeguuyacaʼ Faraón sti buelta, ra guyécabe riʼ bíʼnicabe ti milagru. Aarón bilaa xpara layú, ne gúcani ti beendaʼ ngola. Ca hombre nuu xpiaaniʼ stiʼ Faraón laaca bilaacaʼ xpáracaʼ layú, ne laaca biree jma beendaʼ. Peru ¡biiyaʼ! beendaʼ stiʼ Aarón cayabi ca beendaʼ stiʼ ca hombre nuu xpiaaniʼ ca. Nin ne ngue Faraón qué niná diʼ nundaa ca israelita que.

Ngue runi bidxiña dxi gusiidiʼ Jiobá Faraón xiixa. Nannuʼ ximodo bíʼnibeni la? Jiobá biseenda chii plaga o guendanagana luguiáʼ Egipto.

Despué de stale de ca plaga que la? Faraón rucaaridxi Moisés ne rábibe laa: Bicueeza plaga ca, ne naa zundaa ca israelita riʼ. Peru ribeezadxí si plaga que la? maʼ qué rinádibe. Despué de chii plaga que Faraón gudxi laacabe chécabe.

Runibiaʼluʼ cada tobi de ca chii plaga riʼ la? Gudiʼdiʼ sti yaza ca ne guidúʼyanu xi laacani.

Éxodo 4:27-31; 5:1-23; 6:1-13, 26-30; 7:1-13.