ÓRNI Moisés bibiguet Egipto, gochbu buchbu Aarón de guirá galrradziguiaʼ. Órni Moisés né Aarón bilooyibu guirá galrradziguiaʼ reʼ a guirá israelitas layibu biluladxyibu que Jehová noʼ né layibu.

Ór cú Moisés né Aarón goyeyibu nisló Faraón. Né gochyibu Faraón. Jehová, Dios xtuny Israel ná: Biduidy lagary xcudxi por tzón govitz par tzeyibu gony adoraryibu naʼ ló yoovich. Per Faraón cuapy: Naʼ diti raluladxi Jehová. Diti sadudi lagary israelitas tze.

Faraón nigolú bidzuitz, portín guirá israelitas nayibu cuéyibu tiemp ló xchiinyibu par gony adoraryibu Jehová. Por ngú, buny lafuersyibu a guirá israelitas par gony dxiin más nadip. Guirá israelitas bigotzyibu dool Moisés por guirá mal ni cadudyibu ló, né ndeʼ bunyni que Moisés goyoʼ nabann. Per Jehová góoch láabu que diti tzóbu ló xcalrasaʼni. Né Jehová goní: Naʼ goni que Faraón guiduidy lagary xcudxi.

Moisés né Aarón goyeyibu nisló Faraón stoib buelt. Nigoreʼ ma bunyibu toib ni radziguiaʼ buñ. Aarón bisal xiac layoo, né ndeʼ bidxin góc toib beʼel bief. Per buñnan ni goyoʼ xan xomandary Faraón láaca bisalyibu yac ni napyibu layoo né ndeʼ láaca bidxin góc beʼel. Per ¡bibiʼ! beʼel xtuny Aarón cagaiby beʼel xtuny buñnan ni noʼ xan xomandary Faraón. Ná scú gocni Faraón diti biduidy lagary guirá israelitas par ñée ñony adoraryibu Dios.

Bidxin ór Jehová godiʼx Faraón xalagary. ¿Nanlo ximod bunybu láani la? Biduidybu chii plagas, ni godudy Faraón lainy gudx Egipto.

Órni ma godudy xidal plagas cú, Faraón raxelcaʼbu né raibybu a Moisés: Biscués plaga reʼ né naʼ guiduidy lagary Israel tze. Per órni Moisés rascués plaga reʼ, Faraón ratzá mod nac xpensary. Diti raduidybu lagary tzeyibu. Per órni bilox godudy chii plaga cú biduidybu lagary israelitas nareʼ.

¿Rimbulo cada toib de chii plagas cú la? Bichiʼix guiich, né guisuidyno cada toib plaga reʼ.