Oviwonga omurongo
EHUNGI 32
Oviwonga omurongo
TARA koviperendero mbi. Atjihe matji raisa otjiwonga Jehova tja etere moEngipte. Motjiperendero otjitenga mo munu Aron tji ma tono onḓonḓu Nil nokati ke. Eye tja tjita nao, omeva monḓonḓu ya tjituka ombinḓu. Omahundju ya kokere, nu onḓonḓu ya utire okuṋuka.
Okuzambo Jehova wa tjita kutja ovisume vi pite monḓonḓu Nil. Ovyo vya ri akuhe, okutja omomazuko mu mu terekerwa ozomboroto, na moviyaha ovirungiriro vyozomboroto, na momara wovandu. Ovisume tji vya kokere Ovaengipte ve vi kombera pamwe, okutja ehi arihe otji ra worere.
Okuzambo Aron wa tona ehi nokati ke, nu oruuma rwehi rwa tjituka motumwe. Imbwi oupuka ouṱiṱi mbu tuka nu mbu rumata. Otumwe twa ri otjiwonga otjitjatatu mehi raEngipte.
Noviwonga mbye ya kombunda yaimbi vya hihamisa Ovaengipte uriri, nungwari kavi ṱunine kOvaisrael. Otjiwonga otjitjaine tja ri otjiwonga tjozonḓe ozonene nḓe urire mozondjuwo zOvaengipte. Otjiwonga otjitjatano tja ri kovinamuinyo. Ozongombe nozonḓu nozongombo ozengi zOvaengipte za kokere.
Okuzambo, Moses na Aron va toora ombize nave yumbu meyuru. Oyo ya eta ovirwaro ovivi kovandu na kovinamuinyo. Ihi tja ri otjiwonga otjitjahamboumwe.
Kombunda yanao Moses wa yera eke re meyuru, nu Jehova a hindi oruṱuṱumo nozombawe zombura. Inḓa za ri ozombawe zombura ozombi zombi nḓa rora okukara ko moEngipte.
Otjiwonga otjitjahambondatu tja ri orumbunda rozombahu. Komurungu wanao poo kombunda yanao kakwa ri ozombahu ozengi nao. Ozo za rya oviṋa avihe mbi ha nyanyaurirwe i oruṱuṱumo rombura.
Otjiwonga otjitjamuvyu tja ri onḓorera. Oure womayuva yetatu kwa ri nonḓorera onḓeu kombanda yehi, nungwari Ovaisrael va ri nondjerera pomaturiro yawo.
Korusenina, Mukuru wa raera ovandu ve okutjatja ombinḓu yongombona poo yondjona komivero vyawo. Okuzambo omuengeli waMukuru wa tuurunga moEngipte. Omuengeli tja muna ombinḓu, ka zepere kangamwa umwe ngwa ri mondjuwo ndjo. Nungwari mozondjuwo azehe nḓe ha ri nombinḓu komivero, omuengeli waMukuru wa zepa omaveri wovandu nowovinamuinyo. Ihi tja ri otjiwonga otjitjamurongo.
Kombunda yotjiwonga hi otjisenina, Farao wa raera Ovaisraeli okutjinda. Ovandu vaMukuru avehe va ri ave rirongerere okuyenda, ongurova tjingeyo ndjo owo va uta ouyenda wawo okupita moEngipte.
