Ɛecṛa n lmuṣibat
TAQSIṬ TIS 32
Ɛecṛa n lmuṣibat
MUQEL ţţeswiṛat-agi. Mkul yiwet seg-sent tessken-ed yiwet si lmuṣibat i d-isseɣli Yahwa ɣef Maṣer. Di ţţeswiṛa tamezwarut tzemreḍ aţ-ţwaliḍ Haṛun yekkaten asif n Nnil s uɛekkaz-is. Imiren kan uɣalen waman-nni d idammen. Iḥutiwen mmuten, dɣa yebda yeţfuḥu wasif.
Mbeɛd, Yahwa yessufeɣ-ed seg wasif n Nnil imqerqar. Llan di yal lǧiha: di lkucat, deg urekti, deg wusu n lɣaci, di mkul amkan. Asmi i mmuten yemqerqar-agi, Imaṣriyen jemɛen-ten d iɛemmuṛen, tamurt meṛṛa teţraḥ.
Mbeɛd, Haṛun iwet lqaɛa s uɛekkaz-is, dɣa yuɣal uɣebbar ţ-ţiziţ iteqqsen imdanen d lḥiwan. Tiziţ d lmuṣiba tis tlata i d-yeɣlin ɣef tmurt n Maṣer.
Lmuṣibat i d-itebɛen ḥuzant kan Imaṣriyen, ur nnulent ara At Isṛayil. Lmuṣiba tis ṛebɛa d izumal n yizan imeqranen ikeččmen s ixxamen n Imaṣriyen. Lmuṣiba tis xemsa teɣli-d ɣef lḥiwan. Tesserwet s waṭas, tenɣa lmal amecṭuḥ d umeqran n Imaṣriyen.
Mbeɛd, Musa d Haṛun ddmen-d iɣiɣden, ḍeggren-ten s igenni, dɣa uɣalen ţ-ţimmas i Imaṣriyen d lḥiwan. Tagi d lmuṣiba tis seţţa.
Mbeɛd, Musa yeẓẓel afus-is ɣer igenni, dɣa yefka-d Ṛebbi ṛṛɛud d webruri. Leɛmeṛ i d-yeɣli webruri yecban winna ɣef tmurt n Maṣer.
Lmuṣiba tis tmanya d izumal n wejṛad. Leɛmeṛ ur d-yelli wannect-nni n wejṛad di tmurt n Maṣer. Ayen meṛṛa i d-iǧǧa webruri, ikemmel-as wejṛad.
Lmuṣiba tis tesɛa d ṭṭlam. Yeɣli-d ɣef tmurt, yekka tlata wussan. Lameɛna deg imukan anda zedɣen wat Isṛayil, tella tafat.
Ɣer taggara, Ṛebbi yenna i wat Isṛayil ad ṛuccen s idammen uqelwac neɣ n ikerri tigejda n tewwura n yexxamen-nsen. Mbeɛd, lmelk n Ṛebbi ad iɛeddi ɣef tmurt n Maṣer. Ma yufa idammen ɣef tewwurt, ur ineqq ula d yiwen deg wexxam-nni. Ma d ixxamen anda ur yufi ara idammen, lmelk n Ṛebbi ad ineɣ imenza meṛṛa, ama d wid n yemdanen ama d wid n lmal. Lmuṣiba-ya ţ-ţis ɛecṛa.
Armi i tɛedda lmuṣiba-yagi taneggarut i gumeṛ Ferɛun i wegdud n Ṛebbi ad iṛuḥ. At Isṛayil wejden tura i ṛṛwaḥ. Iḍ-nni dɣa i bdan tikli akken ad ffɣen si Maṣer.
Tuffɣa ixef wis 7 alamma d wis 12.