SAʼ LI junjunq chi eetalil nakʼutunk li lajeebʼ chi rahilal kixtaqla li Jehobʼa saʼ xbʼeenebʼ laj Egipto. Saʼ li xbʼeen rahilal, laj Aaron kixchʼeʼ li nimaʼ Nilo rikʼin li xcheʼ ut li haʼ kisutqʼiik choʼq kikʼ. Ebʼ li kar keʼkamk chisaʼ li nimaʼ ut kiʼok chi chuhoʼk.

Saʼ li xkabʼ rahilal, li Jehobʼa kixbʼaanu naq teʼelq chaq li amoch saʼ li nimaʼ Nilo. Ebʼ li amoch keʼxchʼik ribʼ saʼeb li sekʼ, saʼeb li chʼaat ut yalaq bʼar keʼxkʼe ribʼ. Naq keʼkamk ebʼ li amoch, kichuhoʼk chixjunil li tenamit Egipto.

Saʼ li rox rahilal, laj Aaron kixtochʼ li chʼochʼ rikʼin li xcheʼ ut li poqs kisutqʼiik choʼq suq. Ebʼ li kokʼ suq aʼin ra nekeʼxtiw.

Chirix chik aʼin, kaʼaj chik ebʼ laj Egipto keʼxkʼul li rahilal. Saʼ li xka rahilal keʼwakliik chaq ebʼ li nimla raxyaat ut keʼok saʼebʼ li rochoch laj Egipto. Saʼ li roʼ rahilal, keʼkamk xketomq ebʼ laj Egipto. Keʼkamk naabʼal li wakax, ebʼ li karneer ut ebʼ li chibʼaat.

Saʼ xwaq li rahilal, laj Moises ut laj Aaron keʼxchap li cha ut keʼxkut chiru iqʼ. Tojaʼ naq, keʼnujak saʼ xox ebʼ laj Egipto ut ebʼ li xul.

Saʼ xwuq li rahilal, naq laj Moises kixtaqsi li ruqʼ saʼ choxa, li Jehobʼa kixtaqla chaq saʼ xbʼeenebʼ laj Egipto li kaaq ut li saqbʼach. Aʼin xnimal ru li saqbʼach keʼril ebʼ laj Egipto.

Saʼ xwaqxaq li rahilal, keʼelk chaq li saakʼ malaj ebʼ li chiliʼ. Maajunwa rilomebʼ aʼin ebʼ laj Egipto, chi moko kiʼilmank ta chik. Ebʼ li saakʼ keʼxwaʼ chixjunil li awimq li kixkanabʼ li saqbʼach.

Saʼ xbʼele li rahilal, kiqʼoqyinoʼk li tenamit Egipto chiru oxibʼ kutan. Abʼan li xnaʼajebʼ laj Israel moko kiqʼoqyinoʼk ta.

Saʼ xlaje li rahilal, li Yos kixye rehebʼ laj Israel naq teʼxkʼe xkikʼel chibʼaat malaj karneer chiru roqechal li rokebʼaal li rochochebʼ. Tojaʼ naq li xʼanjel li Yos, kixsuti li tenamit Egipto ut bʼar kiril naq wank kikʼ maaʼani kixchʼeʼ saʼ li ochoch aʼan. Abʼan bʼarwiʼ maakʼaʼ kikʼ, keʼkamk chixjunilebʼ li xbʼeen alalbʼej. Ut keʼkamk ajwiʼ ebʼ li xbʼeen ral li xul.

Toj saʼ li rahilal aʼin laj Faraon kixkanabʼebʼ chi xik laj Israel. Abʼan li xtenamit li Yos yal oybʼeenink aj chik yookebʼ. Saʼ li qʼoqyink ajwiʼ aʼan keʼelk chaq Egipto.