AKITALA bino bipikichala. Byonse bino bibena kumwesha myalo Yehoba yo aletele mu Ijipita. Mu kipikichala kitanshi mona Alona watanyikile kichi kyanji pa Mukola wa Nile. Byo aubile bino, mema mu mukola aalukile ke mashi. Masabi afwile, kabiji ne mukola watendekele kununka.

Kyalondejilepo, Yehoba walengejile mabombwe kutendeka kufuma mu Mukola wa Nile. Akumbenetu konse, mu bitofu monse, ne pa myanya ponsetu. Mabombwe byo afwile, bena Ijipita bealumbikile milumba milumba, ne ntanda yaubiletu nuu.

Kepo Alona apumine kamama kanji pa lukungu lwa panshi, lwaalukile ke nkuso. Tuno ke tubilongolo tucheche tusumañana. Nkuso ye mwalo wa busatu waubilwe mu kyalo kya Ijipita.

Myalo yashala yakatezhengatu bena Ijipita bonka, kechi bena Isalela ne. Mwalo wa buna ke malunzhi a balundeba bavula batwelele mu mazubo onse a bena Ijipita. Mwalo wa butanu walengejile banyama kufwa. Bañombe, mikooko ne bambuzhi bavula ba bena Ijipita bafwile bingi.

Mwalo walondejilepo, ba Mosesa ne Alona bashikwile buto ne kwibutaya mwiulu. Bwalengejile bantu ne banyama kwikala na bilonda. Uno wajinga mwalo wa butanu na umo.

Panyuma ya bino Mosesa watanyikile kuboko kwanji mwiulu ne Yehoba wanokeshe mvula mukatampe wa mabwe. Ye wajinga mvula mukatampe bingi mu kyalo kya Ijipita.

Mwalo wa butanu na busatu wajinga wa nzhiye. Kechi kwakimwekelepo kala nzhiye yavula mu kyokya kyalo na biji yoya yajingako ne. Yajiile kyonse kyabujile konaunwa na mvula wa mabwe.

Mwalo wa butanu na buna wajinga wa mfishi. Ntanda yajinga mu mfishi ikatampe pa moba asatu, bino ku lubaji lwa bena Isalela kwajinga kyeya.

Kyapeleleko, Lesa wabujile bantu banji amba bakashikulepo mashi a mwana mbuzhi nangwa a mwana mukooko bakeashinge pa mashiki a ku bibelo byabo. Kepo malaika wa Lesa apitañene monse mu kyalo kya Ijipita. Malaika wapitayijile pa mazubo ponse po amwene mashi, kabiji kafwamo nangwa umo ye aipaile ne. Bino mu mazubo onse o babujile kushinga mashi pa mashiki a ku bibelo, malaika wa Lesa waipayilemo babeji ba bantu ne ba banyama. Uno ye wajinga mwalo wa bujikumi.

Panyuma ya uno mwalo wapeleleko, Felo waambijile bena Isalela amba baye. Bantu ba Lesa bonse batengejilenga kuya, kabiji bonkabwa bufuku batuntukile kufuma mu kyalo kya Ijipita.