LUK dɛn pikchɔ ya. Dɛn ɔl de sho di bad tin dɛn we Jiova kam wit na Ijipt. Di fɔs pikchɔ de sho we Erɔn de nak Riva Nayl wit in stik. We i du dat, di wata na di riva tɔn blɔd. Di fish dɛn day, ɛn di riva bigin smɛl bad bad wan.

Afta dat, Jiova mek frɔg dɛn kɔmɔt insay Riva Nayl. Dɛn bin de ɔlsay. Dɛn bin de insay di ovun dɛn, na di bekinpan dɛn ɛn na pipul dɛn bed dɛn. We di frɔg dɛn day, di Ijipshian dɛn gɛda dɛn bɔku bɔku wan, ɛn di ples bigin smɛl bad bad wan.

Afta dat, Erɔn nak di grɔn wit in stik, ɛn di dɔti tɔn smɔl smɔl flay dɛn we de bɛt. Dɛn smɔl smɔl flay ya na di tɔd bad tin we apin na Ijipt.

Ɔl di ɔda bad tin dɛn nɔ ambɔg di Izrɛlayt dɛn; na di Ijipshian dɛn nɔmɔ dɛn ambɔg. Di bad tin we mek 4, na big big flay dɛn. Dɛn flay ya bin plɛnti na di Ijipshian dɛn os. Di bad tin we mek fayv kam pan di animal dɛn. Bɔku pan di Ijipshian dɛn kaw, ship ɛn got dɛn, bin day.

Afta dis, Mozis ɛn Erɔn tek ashis ɛn sɛn am ɔp. Dis mek di pipul dɛn ɛn di animal dɛn pul bwɛl na dɛn bɔdi. Na dis na di bad tin we mek siks.

Afta dat, Mozis pɔynt ɔp di klawd, ɛn Jiova mek tɛnda bigin krak ɛn ren we fiba smɔl smɔl ays blɔk bigin kam dɔŋ. Da ren de bin ebi pas ɔl di ɔda ren dɛn we bin dɔn ɛva kam na Ijipt.

Di bad tin we mek et na bin bɔku bɔku lokɔs dɛn. Lokɔs dɛn nɔ bin ɛva bɔku so na Ijipt. Ɛn frɔm da tɛm de, lokɔs dɛn nɔ bɔku so igen na Ijipt. Dɛn it ɔl di plant dɛn we di ren we fiba ays blɔk nɔ bin pwɛl.

Afta dat, di ples dak bad bad wan. Ɔlsay dak fɔ tri dez, bɔt layt bin de usay di Izrɛlayt dɛn de. Na dis na di bad tin we mek nayn.

Afta ɔl dis, Gɔd tɛl in pipul dɛn fɔ kil yɔŋ got ɔ yɔŋ ship ɛn rɔb di blɔd na dɛn domɔt. Dɔn Gɔd in enjɛl pas ɔlsay na Ijipt. Di enjɛl nɔ kil nɔbɔdi na di os dɛn we gɛt blɔd na di domɔt. Bɔt di enjɛl kil di pipul dɛn ɛn di animal dɛn fɔs pikin, na ɔl di os dɛn we nɔ gɛt blɔd na di domɔt. Na dis na di bad tin we mek tɛn.

Afta dis las bad tin, Fɛro tɛl di Izrɛlayt dɛn fɔ kɔmɔt na Ijipt. Gɔd in pipul dɛn bin dɔn rɛdi fɔ go, ɛn na da nɛt de dɛn kɔmɔt na Ijipt.