Esimwititi 32: Mahepeko 10
TARA komafano. Nkenye limwe kuna kulikida ehepeko eli ga retere Jehova moEgipite. Mefano lyokuhova to mono mo Arona ana kutoona pomukuro gwaNili nompango zendi. Apa ga deye po, mema gomomukuro makura taga lisinti ga kare honde. Nomfi kwa fire, makura mukuro tagu tameke kunuka.
Kutunda opo, Jehova ta ninki mafuma ga tunde momukuro gwaNili. Ago kwa kere nakunye—momasuga nomoyifoyo noponombete dovantu—nakunye. Mafuma apa ga fire, Vaegipite makura tava ga pongaike nondambo dononene, ano sirongo tasi nuka uworodi.
Arona makura ta toona mpango zendi pevhu, ano mbundu tazi lisitunuka nomwe. Ado tumbumburugona otu atu humu. Nomwe kwa kere ehepeko lyautatu mosirongo saEgipite.
Mahepeko gokukwama ko kwa kundamene Vaegipite velike, kapisi noVaisraeli. Lyaune kwa kere nondi dokuhuma edi da dwayumukilire momambo goVaegipite navenye. Ehepeko lyautano kwa kere koyimuna. Nongombe nononzwi noyikombo yoyinzi yoVaegipite kwa fire.
Kukwama ko, Mosesa naArona tava gusa enoto nokulimwagera meguru. Alyo kwa retere yironda yoyidona kovantu nokoyikorama. Eli kwa kere ehepeko lyauntazimwe.
Konyima zeyi Mosesa ta zanza kuwoko kwendi keguru, ano Jehova makura ta tumu nombadi nakamanya. Ado kwa kere nombadi dakamanya da pitakanene nadinye edi da horoka moEgipite.
Ehepeko lyauntantatu kwa kere edugi lyenene lyasimbonde. Nokwanare si ntani nokonyima zosiruwo sina kapi kwa kara rumwe simbonde gomunzi ngogwina. Simbonde kwa lire nayinye eyi ya pilire kuzonauka kwakamanya.
Ehepeko lyountane kwa kere mundema. Emundema kwa kudumikire sirongo mazuva gatatu, nye Vaisraeli awo va kere nouzera oku va tungire.
Mouhura, Karunga ta tantere vantu vendi va kwite honde zosikombogona ndi zonzwigona komarungavero gawo. Muengeli gwaKarunga makura ta piti moEgipite. Muengeli apa ga mwene honde, kwato ogu ga dipagere momembo lina. Nye momambo nagenye aga ga pilire honde pomarungavero, muengeli gwaKarunga kwa dipagere nombeli dovantu ntani nedi doyikorama. Eli kwa kere ehepeko lyomurongo.
Konyima zehepeko eli lyokuhulilira, Farawo ta tantere Vaisraeli va ze. Vantu vaKarunga navenye kwa liwapaikilire va ze, ano masiku googo tava tameke rugendo rwawo rokutunda moEgipite.
Exodus magaununo 7 dogoro 12.
Mapuro
- Mokuruganesa mafano aga vana likida apa, singonona mahepeko gatatu gokuhova aga ga retere Jehova moEgipite.
- Malisigo musinke ga kere po pokatji komahepeko gatatu gokuhova ntani nomahepeko gokukwama ko?
- Ehepeko musinke lya kere lyaune, lyautano ntani lyauntazimwe?
- Singonona ehepeko lyauntambali, lyauntantatu, ntani lyauntane?
- Yinke ga tanterere Jehova Vaisraeli yokurugana komeho zehepeko lyomurongo?
- Yinke lya kere ehepeko lyomurongo, ntani yisinke ya horokere konyima zalyo?
Mapuro gokugwederera ko
- Resa Exodus 7:19-8:23.
Nampili ngomu nompure daEgipite da vhulire kutemwinina mahepeko gavali gokuhova gaJehova, yinke ya va sinininkire va dimburure konyima zehepeko lyautatu?
Ngapi omu ehepeko lyaune lya likidire evhuliko lyaJehova lyokuvatera vantu vendi, ntani kudiva eyi, ngapi ayi ninkisa vantu vaKarunga va lizuvhe ngomu vana kundindira ‘mahepeko gomanene’ aga va pumbire?
- Resa Exodus 8:24; 9:3, 6, 10, 11, 14, 16, 23-25; ntani 10:13-15, 21-23.
Mahepeko Murongo, nombunga musinke mbali donondona ga retere pouzera, ntani ngapi eyi ayi kundama mutaro gwetu kodo nombunga naina?
Exodus 9:16, ngapi omu ali tu vatere mokukwata egano eyi Jehova ga pulisira Satana mokukara dogoro ngesi?
- Resa Exodus 12:21-32.
Ngapi omu za retere Paska eparu kovanzi, ntani yinke za fanekesere?
