Icisimicisyo 32: Ifincinsya 10
LOLESYA pa fikope. Cimo cimo cilukulanga icincinsya baYehoba baletele mu Ijipiti. Mu cikope cakutanga ungabona Aloni alukupama Inika ya Nayili ku nkoli yakwe. Ili acitile’fyo, amenda mu nika alyalukile’milopa. Isabi lyalifwile, ne nika yalitatikilo’kununka.
Ukukonkapo, baYehoba balilengele babombwe ukufuma mu Nika ya Nayili. Bali ponseponse lukoso—mu fyakwipikilamo, mu fyakupangilamo sinkwa, mu malo abantu—ponseponse lukoso. Ili babombwe bafwile abaIjipiti balibatulaikile mu mipili iikulu, kabili icalo calinunkile kuli bo.
Eli Aloni apamine umusili ku nkoli yakwe, kabili ifukutu lyalyalukile mu tusisi utusuma. Utu’tusisi twali cincinsya ca butatu mu calo ca Ijipiti.
Ifincinsya fyasyalako fyalukusomesya lukoso abaIjipiti, abaIsilaeli bo koku. Icincinsya ca bune cali ca filunsi ifyanyemukile mu maŋanda abaIjipiti monse. Icincinsya ca bufisanu cali pa nama. Isingi iŋombe, imbelele ne mbusi sya baIjipiti syalifwile.
Ukukonkapo, Mose na Aloni balikamwine amatoi ne kuyafikisa mu mwela. Alilengele ifilonda ifibipile pa bantu na pa nama. Ici cali cincinsya ca bufisanu na cimo.
Panuma yafyefyo Mose alisuntwile ukuboko kwakwe kwiulu, kabili baYehoba baliletele ukululuma ne mfula ya mabwe. Yali ni mfula ya mabwe iibipisye iitaingacitikapo mu Ijipiti.
Icincinsya ca bufisanu na fitatu cali ce bumbe’likulu ilya’nsye. Takwalipo impindi ili insye syafulile makosa. Neli panuma yayeyo impindi.
Icincinsya ca bufisanu na fine cali ca mfinsi. Pa nsiku sitatu imfinsi itikeme yalifimbile pa calo, pano abaIsilaeli bali ne kutuba uko uku balukwikala.
Mukupelako, baLesa balyebele abantu babo ukusanse’milopa ya kana ka mbusi neli aka mbelele pa fiti fya kumpelo ya milyango. Eli inkalamba ya baLesa yalipitene mu Ijipiti. Ili inkalamba yabwene imilopa, tayaipeyepo uuli onse mu ŋande’yo. Pano pa maŋanda onse apatapali imilopa pa fiti ifya kumpelo ya milyango, inkalamba ya baLesa yalipeyemo ababele ba bantu ne ba nama. Ici cali cincinsya ce kumi.
Panuma ya cincinsye’ci ca kupelako, Falo alibulile abaIsilaeli ukuya. Abantu ba baLesa bonse bali abaliteyenye ukuya, kabili bwenka bulya busiku balitatikileko ukufuma mu Ijipiti.
Ifyakufuma Ifyapitala 7 ukufika ku 12.
Ifyakwipusya
- Ukupyungisya ifikope ifilangilwe apa, bulisisya ifincinsya fitatu ifya kutanga ifi baYehoba baletele mu Ijipiti.
- Findo fyapuseneko ku fincinsya fya kutanga fitatu ne fincinsya fyasyeleko?
- Kani fyali fincinsya fyando ifya bufine, fisanu, ne ca bufisanu na cimo?
- Bulisisya ifincinsya fya bufisanu na fibili, fisanu na fitatu, ne ca bufisanu na fine.
- Mba findo baYehoba babulile abaIsilaeli ukucita ili takungaba icincinsya ce kumi?
- Icincinsya ce kumi cali cando, kabili findo fyacitikile panuma yaciko?
Ifyakwipusya na fimbi
- Pendeni Ifyakufuma 7:19-8:23.
Nangaba’ti abalaye ba baIjipiti balicitile ifipalileko ku fincinsya fya baYehoba fibili ifya kutanga, mba findo babapangilisye ukusumina panuma ya cincinsya ca butatu? (Fum. 8:18, 19; Mat. 12:24-28)
Kani icincinsya ca bufine calilangile syani amakosa abaYehoba aakulama abantu babo, kabili ukwisibe’ci kulalenga abantu ba baLesa ukumfwa syani ili basinkamenwe ‘ne kukululuko’kukulu’ ukusimikilwe? (Fum. 8:22, 23; Fisu. 7:13, 14; 2 Ifye. 16:9)
- Pendeni Ifyakufuma 8:24; 9:3, 6, 10, 11, 14, 16, 23-25; na 10:13-15, 21-23.
Kani niesa amabumba ayo Falo ne balaye baimakanineko, kabili koti niyo muli bulelo, nifindo ayo mabumba afililwe ukucita? (Fum. 8:10, 18, 19; 9:14)
Kani Ifyakufuma 9:16 filatofwa syani ukumfwikisya umulandu baYehoba basuminisisye ati Satana alukulipo ukufika na muli bulelo? (Loma. 9:21, 22)
- Pendeni Ifyakufuma 12:21-32.
Kani ica Muciluko calilengele syani ati ukupuluka kubeko ku bantu abengi, kabili ica Muciluko calukwimakaninako indo? (Fum. 12:21-23; Yoa. 1:29; Loma. 5:18, 19, 21; 1 Kol. 5:7)
