MPANJI 32

Yipupu 10

TALAÑA haniyi nyevulu. Mwevulu wudi wejima wunakumwekesha chipupu chaleteliyi Yehova muEjipitu. Hamwevulu watachi wunatweshi kumona Aroni nakweta mbwechi yindi haKaloña Nile. Chelili netihu dehi, menji amukaloña abalumukili mashi. Inshi jafwili, nawa kaloña katachikili kununka.

Chalondelelihu, Yehova welishili ayuula kukanduka kufuma muKaloña Nile. Ayuula adiña kwejima—mumajiku, nihayikañu yakochelahu, nihatudidi twawantu—mwejima. Chafwiliwu ayuula, eniEjipitu ayikuñwijili nyilumba yeneni, dichi mwituña mwanunkileña yuula hohu.

Kutwalamuna, Aroni weteli hamaseki nambwechi yindi, lunkuñu lwabalumukili mbwibu. Itu hitububu twanyanya twatuukaña nawa twasumanaña. Mbwibu yadiña chipupu chamuchisatu mwituña daEjipitu.

Yipupu yadiña nakukatisha hohu eniEjipitu, aIsarela hiyayikatishileñaku. Chipupu chamuchiwana chadiña himalembu awanjinji eñilili mumatala ejima aweniEjipitu. Chipupu chamuchitanu chadiña hadi ayimuna. Añombi nianyikoku niampembi amavulu aweniEjipitu afwili.

Chalondelelihu, Mosi niAroni anoneli wuti nakuwifukumwina mwiwulu. Wakojejeli mahuti atama hadi antu niayimuna. Ichi dichadiña chipupu chamuchitanu nachimu.

Hanyima yanichi Mosi wolweli chikasa chindi mwiwulu, Yehova watemesheli kudidima ninvula yamalola. Yadiña nvula yamalola yabulawu kumonahu dehi muEjipitu.

Chipupu chamuchitanu nachisatu chadiña tubola. Kanda kwikaleñahu dehi tubola twatuvulu neyi ituku. Twadyili yuma yejima yabuliliwu kukisañana kunvula yamalola.

Chipupu chamuchitanu nachiwana chadiña mwidima. Hamafuku asatu ituña dadiña mumwidima wabwi-i, ilaña aIsarela adiña nachejeji kuyadiña nakushakamawu.

Nkumininaku, Nzambi walejeli antu kusampwila mashi amwana kampembi hela amwana kamukoku kuyipamba yawu. Dichi kañelu kaNzambi wahitili muEjipitu. Kañelu chamonayi mashi, hajahilimu muntu wudi wejima munodu italaku. Ilaña hamatala hejima habulili mashi kuyipamba, kañelu kaNzambi wajahili awedi ejima awantu niayimuna. Ichi chadiña chipupu cha 10.

Hanyima yanichi chipupu chakukumishaku, Fwaro walejeli aIsarela kuya. Antu jaNzambi ejima adiña adiloñesha kuya, dichi wenowu wufuku atachikili kufuma muEjipitu.

Kwidika kapetulu 7 nakushika ku 12.