STORJA 32
L-10 Kastigi
ĦARES lejn l-istampi. Kull waħda turi kastig li Ġeħova ġab fuq l-Eġittu. Fl-ewwel stampa tistaʼ tara lil Aron imiss ix-Xmara Nil bil-bastun tiegħu. Meta għamel hekk, l-ilma fix-xmara nbidel f’demm. Il-ħut miet, u x-xmara bdiet tinten.
Imbagħad, Ġeħova ġiegħel li jiġu żrinġijiet mix-Xmara Nil. Daħlu kullimkien—fl-ifran, fid-dixxijiet, fis-sodod tan-nies—kullimkien. Meta ż-żrinġijiet mietu, l-Eġizzjani ġabruhom fi gzuz kbar, u l-art kienet tinten ħafna minħabba fihom.
Wara dan, Aron mess l-art bil-bastun tiegħu, u t-trab inbidel f’nemus. Dawn huma insetti żgħar li jtiru u jigdmu. In-nemus kien it-tielet kastig fuq l-art tal-Eġittu.
Il-kumplament tal-kastigi laqtu lill-Eġizzjani biss, u mhux lill-Iżraelin. Ir-rabaʼ kien kastig taʼ dubbien kbir u dawn daħlu fid-djar tal-Eġizzjani kollha. Il-ħames kastig laqat lill-annimali. Ħafna mill-baqar u n-nagħaġ u l-mogħoż tal-Eġizzjani mietu.
Imbagħad, Mosè u Aron ħadu xi rmied u waddbuh fl-arja. Dan wassal biex in-nies u l-annimali jkollhom l-infafet. Dan kien is-sitt kastig.
Wara dan, Mosè għolla idu lejn is-sema, u Ġeħova bagħat ir-ragħad u s-silġ. Kienet l-agħar xita bis-silġ li l-Eġittu qatt kellu.
It-tmien kastig kien qatgħa kbira taʼ ġurati. Qatt qabel dak iż-żmien jew s’issa ma kien hemm daqstant ġurati. Kielu dak kollu li ma qeridx is-silġ.
Id-disaʼ kastig kien tad-dlam. Għal tlett ijiem kien hemm dlam ċappa fuq l-art, imma l-Iżraelin kellhom id-dawl fejn kienu qed jgħixu huma.
Fl-aħħar, Alla qal lill-poplu tiegħu biex jitfgħu ftit mid-demm taʼ mogħża jew nagħġa żgħira mal-koxox tal-bibien tagħhom. Imbagħad, l-anġlu t’Alla għadda minn fuq l-Eġittu. Meta l-anġlu kien jara d-demm, ma kien joqtol lil ħadd f’dik id-dar. Imma, fid-djar kollha fejn ma kienx hemm demm mal-koxox tal-bieb, l-anġlu t’Alla kien joqtol lill-ewwel imwieled tal-bnedmin u tal-annimali. Dan kien l-10 kastig.
Wara dan l-aħħar kastig, il-Fargħun qal lill-Iżraelin biex jitilqu. Il-poplu t’Alla kien lest biex imur, u dak il-lejl stess bdew ħerġin mill-Eġittu.