TALA omalutalatu aa. Kese lutalatu lulekesa ehingano Yehova aetele mo Egitu. Polutalatu luotete upondola okutala Arau uveta notyimuti tyae komeva Ondongi Nilu. Etyi avetako, omeva ondongi atyituka ohonde. Onohi ambuho ambunkhi, iya ondongi ainiki omapita.

Ehingano lia vali, Yehova wataha omamboto Mondongi Nilu, aeliyandyana motyilongo atyiho tyo Egitu. Aanyingila monofolono, no monombiya, aalondo ko-​maula ovanthu. Etyi omamboto ankhia, ova Egitu aveongiya ononthumbo. Otyilongo atyiniki omapita unene mokonda yomamboto oo.

Okulandulisako, Arau avete pohi notyimuti tyae, iya eheke alityituka onome. Onome ounyama umue oututu unumata. Olio ankho ehingano liatatu mo Egitu.

Omahingano omakuavo avetele vala ova Egitu, kova Isilayeli kaehikileko. Ehingano liakuana ankho oliononyi mbu-​mue ononene. Ambunyingila monondyuo ambuho mbova Egitu. Ehingano liatano ankho liavetele vala ovipako. Onongombe ononyingi, nonongi, novikombo viova Egitu, avinkhi.

Moisesi na Arau vapola etwe, aveliyumbu peulu. Etwe olio alietela ovanthu no vinyama ovinthimba. Olio ankho ehingano liapandu.

Ehingano liapanduvali, Moisesi wayelula okuoko kuae peulu. Iya Yehova atumikisa omititimo nongandavila. Ankho yali ongandavila imue onene iheneende mo Egitu.

Ehingano liatyinana, ankho olio-​mamphunia omanene. Kakunekale vali omamphunia omanyingi ngaana. Alile atyiho tyahupile kongandavila.

Ehingano liatyive, ankho enthiki limue enene. Otyilongo tyo Egitu atyikala menthiki limue enene ononthiki ononthatu. Mahi, konthele yova Isilayeli ankho kuna otyitei.

Konyima yatyiho otyo, Huku apopila ovanthu vae vawaveke ohonde yo-​tyikombuena ine oyongiona, kovikulilo vionombundi mbavo. Etyi oandyu ya Huku yapita mo Egitu, monondyuo ambuho yamona ohonde, kayaipaelemo nawike. Mahi, monondyuo ambuho ankho muhena ohonde povikulilo, oandyu ya Huku aiipamo ovana aveho voviveli, vovanthu no vovipako. Olio ankho ehingano lia tyekwi.

Konyima yehingano olio, Farao atumu okupopila ova Isilayeli vaye. Ovanthu va Huku ankho aveho velipongiyale pala okuenda. Iya mounthiki watyo oo, avahimbika oungendi wavo wokutunda mo Egitu.