Ekitebyo 32

Ebibonaboneso 10

REEBA ebishushani ebi. Buri kimwe nikyoreka ekibonaboneso eki Yehova yaaretsire ahari Misri. Omu kishushani ky’okubanza nooreeba Arooni arikuteera enkoni ye omu maizi g’Omugyera Nailo. Ku yaakikozire, amaizi omu mugyera gaakahinduka eshagama. Eby’enyanja byafa, n’omugyera gwatandika kunuuka.

Ekindi, Yehova yaimusya ebikyere kuruga omu Mugyera Nailo. Byabuga hoona—omu mateekyero, omu masafuriya, omu bitanda by’abantu—buri hantu hoona. Ebikyere ku byafiire, Abanyamisri baabirundaana emituumo n’emituumo, reero ensi yoona yaanuuka ahabwa byo.

Bwanyima Arooni yaateera enkoni ahansi, reero omucuucu gwahinduka emikwikwi. Obu n’obukooko bukye burikutonera. Okutaahirirwa emikwikwi kikaba kiri ekibonaboneso kya kashatu omu nsi ya Misri.

Ebibonaboneso ebyatsigaire bikabonabonesa Abanyamisri bonka. Ekya kana kikaba kiri ebishohera bihango ebyataahire omu maju g’Abanyamisri boona. Ekya kataano kikakwata aha matungo. Ente, entaama, n’embuzi z’Abanyamisri ezirikukira obwingi zikafa.

Ekyakuratsireho, Musa na Arooni baatwara eiju kandi barirekyera ahaiguru. Ryarwaza abantu n’amatungo ebizimba bibi munonga. Eki kikaba kiri ekibonaboneso kya mukaaga.

Bwanyima y’ekyo Musa yaimusya emikono ye ahaiguru, atyo Yehova yaayohereza orubaare. Rukaba ruri orubaare rubi munonga orutakagwahoga omu nsi ya Misri.

Ekibonaboneso kya munaana kikaba kiri okuteerwa enzigye nyingi. Zikaba zitakabahoga kandi tihakabahoga enzigye nyingi zityo okwiha obwo. Zikarya buri kintu eki orubaare rwatsigireho.

Ekibonaboneso kya mwenda kyaba okushwekwa omwirima. Okumara ebiro bishatu, omwirima ndindindi gukashweka ensi, kwonka Abaisraeli bo bakaba baine omushana ei baabaire nibatuura.

Aha muheru, Ruhanga yaagambira abantu okusiiga eshagama y’omwana gw’embuzi nari ey’ogw’entaama aha biti by’emiryango. Reero maraika wa Ruhanga yaaraba Misri. Maraika ku yaabaire areeba eshagama, akaba ataita omuntu weena omu nju egyo. Kwonka omu maju goona agaabaire gatariho eshagama aha biti by’emiryango, maraika wa Ruhanga akaita emijigaijo yombi ey’abantu n’enyamaishwa. Eki kikaba kiri ekibonaboneso kya 10.

Bwanyima y’ekibonaboneso eki ekirikushembayo, Faraho akagambira Abaisraeli kugyenda. Abantu ba Ruhanga bakaba baayeteekateekire kugyenda, kandi omuri ekyo kiro bakatandika orugyendo rwabo kuruga omuri Misri.

Okuruga eshuura 7 okuhika 12.