NEA nvoninli ne mɔ. Ko biala kile ngyegyelɛ mɔɔ Gyihova vale rale Yigyibiti anwo zo la. Wɔ nvoninli ne mɔɔ lumua la anu, ɛnwu Aalɔn kɛ ɔlɛfa ye kpɔma ne yeabɔ Azule Naele anu. Ɔyɛle la, nzule ne mɔɔ wɔ azudenle ne anu la hakyile mogya. Fɛlɛ ne mɔ wuwule, na azudenle ne bɔnle.

Bieko, Gyihova manle ahɛlɛne vi Azule Naele anu rale. Ɛnee bɛwɔ ɛleka biala—bɛ fonlomo ne mɔ anu, kpanwo ahyɛnze nu, menli ɛzokpa zo—ɛleka biala. Mɔɔ ahɛlɛne ne mɔ wuwule la Yigyibitima ne mɔ huohuanle bɛ edukue edukue, na azɛlɛ ne azo amuala bɔnle.

Akee Aalɔn finle ye kpɔma ne aze, na munlutu ne hakyile ngokowule. Ɛhye mɔ le ngɛkɛba ngyikyi bie mɔɔ bɛtu na bɛkeka. Ngokowule ne mɔ a le ngyegyelɛ ne mɔɔ tɔ zolɛ nsa mɔɔ rale Yigyibiti azɛlɛ ne azo a.

Ngyegyelɛ ne mɔɔ ɛha la hanle Yigyibitima ne ala, yeanga Yizilayɛma ne mɔ. Ngyegyelɛ ne mɔɔ tɔ zolɛ nna la le nrɛzenra mgbole bie mɔɔ yɛle Yigyibitima ne mɔ azua nu adɔka adɔka a. Ngyegyelɛ ne mɔɔ tɔ zolɛ nnu la hanle nyɛmoa. Yigyibitima ne nlankɛ nee mboane nee mbɔnkye dɔɔnwo wuwule.

Mɔɔ doa ye la, Mosisi nee Aalɔn vulale nzonle na bɛkpondenle ye anwomanyunlu. Ɔmanle nyila nwunwunle menli ne nee nyɛmoa ne mɔ. Ɛhye a le ngyegyelɛ ne mɔɔ tɔ zolɛ nsia a.

Ɛhye anzi, Mosisi dendenle ɔ sa anwomanyunlu, na Gyihova manle maanle nu hulule, na ezuawolɛ dɔle. Ɛnee ɔle ezuawolɛ mɔɔ bie ɛtɛtɔle Yigyibiti ɛlɛ a.

Ngyegyelɛ ne mɔɔ tɔ zolɛ mɔtwɛ la le abɛbɛ adɔka. Ɛnee abɛbɛ dɔɔnwo zɔhane bie ɛtɛbale ɛlɛ na yemɔ anzi noko bieko anzi. Bɛlile debie biala mɔɔ ezuawolɛ ne anzɛkye ye la amuala.

Ngyegyelɛ ne mɔɔ tɔ zolɛ ngɔnla la le awozinli. Awozinli kabikabi vale azɛlɛ ne azo amuala toonwo kenle nsa, noko ɛnee wienyi wɔ ɛleka mɔɔ Yizilayɛma ne wɔ la.

Awieleɛ kolaa ne, Nyamenle hanle hilele ye menli ne kɛ bɛva abɔnkye anzɛɛ boane ralɛ mogya bɛha bɛ nlenkɛ ne felɛmo ne mɔ anwo. Akee Nyamenle anwumabɔvolɛ pɛle nu wɔ Yigyibiti. Saa anwumabɔvolɛ ne nwu mogya ne a, ɔngu awie biala wɔ sua nu ɛkɛ ne. Noko wɔ azua mɔɔ mogya ɛnle bɛ nlenkɛ ne felɛmo ne mɔ anwo la anu, Nyamenle anwumabɔvolɛ ne hunle menli nee nyɛmoa belamunli mralɛ kɔsɔɔti. Ɛhye a le ngyegyelɛ ne mɔɔ tɔ zolɛ 10 ne a.

Ngyegyelɛ ɛhye mɔɔ li awieleɛ la anzi, Falo hanle hilele Yizilayɛma ne kɛ bɛvi ɛkɛ bɛhɔ. Ɛnee Nyamenle menli ne amuala ɛziezie bɛ nwo kɛ bɛkɔ, na kenle ko nɔe ne ala bɛvile Yigyibiti.