CHAWILAMPEʼ ri täq wachbʼäl. Jujun chike wa täq wachbʼäl kukʼut ri jujun täq kʼäx che xuya lo Jehová puwiʼ Egipto ojer. Ri nabʼe kukʼutu chiʼ ri Aarón tijan kuqasaj rucheʼ chupam ri nim jaʼ (o bʼeyaʼ) Nilo. Chiʼ xubʼan wariʼ, ri jaʼ xubʼan kikʼ, rumal wariʼ ri jaʼ xubʼan chu xuqujeʼ ri täq kär e kʼo chupam xekamik.

Tekʼuriʼ ri Jehová xubʼano che xeʼel lo stutzʼ (nikʼaj chiköp junam che ixpëq) chupam ri nim jaʼ ubʼiʼ Nilo. Wanikʼaj täq chiköp xeʼok chupam täq tuj, chupam täq bʼanbʼäl kaxlanwa, puwiʼ täq chʼat, ronojel täq ja xeʼok wi. Chiʼ wanikʼaj täq chiköp xekamik, ri egipcios xkemolo tekʼuriʼ ronojel ri tinamit xubʼan chu.

Tekʼuriʼ Aarón xuya jun cheʼ che ri ulew tekʼuriʼ wariʼ xubʼan jejenes, wariʼ xa e nikʼaj alaj täq chiköp che kʼo kixikʼ xuqujeʼ ketiʼonik. Are waʼ ri urox kʼäx xpe puwiʼ Egipto.

Ri nikʼaj chik täq kʼäx xiw xpe pa kiwiʼ ri egipcios, ri täq israelitas xpe ta wa nikʼaj chik kʼäx pa kiwiʼ. Ri ukaj kʼäx xpe pa kiwiʼ ri egipcios are nikʼaj nimaq täq amolo (üs) che xeʼok pa ronojel täq ja. Ri uroʼ kʼäx are chiʼ xpe yabʼil chike ronojel täq chiköp. Xekam sibʼalaj e kʼi täq wakax (bʼaka), täq chij xuqujeʼ täq kʼisikʼ kech ri egipcios.

Tekʼuriʼ ri Moisés rukʼ Aarón xkesikʼ chaj rukʼ kiqʼabʼ tekʼuriʼ xkekʼaq bʼi ri chaj chi kaj, wariʼ xuya nimaq täq chʼaʼk chikij ri winaq xuqujeʼ chikij täq chiköp. Are waʼ ri uwaq kʼäx.

Tekʼuriʼ ri Moisés xuyik uqʼabʼ chikaj, rukʼ wariʼ ri Jehová xuya lo jabʼ kʼo saqbʼach xuqujeʼ qʼaqʼ (rayo) chupam. Ri täq egipcios kilom ta saqbʼach junam rukʼ wariʼ.

Ri uwajxaq kʼäx are sibʼalaj e kʼi täq sakʼ xepetik. Kʼot kilom jun kʼäx rukʼ sakʼ junam rukʼ wariʼ xuqujeʼ kiltaj ta chi jun chik kʼäx junam rukʼ wajun. Xketij bʼi ronojel su xukamsaj ta ri saqbʼach.

Ri ubʼelej kʼäx are jun nimalaj qʼequʼm xpe puwiʼ Egipto. Oxibʼ qʼij xubʼan ri qʼequʼm puwiʼ wajun nimalaj tinamit, tekʼuriʼ pa kitinamit ri israelitas, kʼot xok wajun uwäch qʼequʼm riʼ.

Kʼisbʼal re, ri Ajawaxel xubʼij che ri tinamit Israel che kkekoj rukikʼel jun alaj chij weneʼ jun alaj kʼisikʼ che ri täq raqan ri uchiʼ kichoch. Tekʼuriʼ ruʼangel ri Jehová xqʼax (xekʼow) puwiʼ Egipto. Chiʼ ri ángel krilo che kojom ri kikʼ, kʼot nijun kukamsaj chupam wajun ja. Tekʼuriʼ chiʼ krilo che kʼot ri kikʼ che täq raqan uchija, kukamsaj ri nabʼe kalkʼwal ri winaq xuqujeʼ kech täq chiköp. Are waʼ ri ulajuj kʼäx.

Chiʼ xkʼis wajun kʼäx, ri Faraón xuya chike ri israelitas xebʼek, xuqujeʼ ri israelitas keyeʼm chik che kbʼix wariʼ chike (kyubʼanch kibʼ). Che wajun aqʼabʼ riʼ xeʼel bʼi chupam ri tinamit Egipto.