AKARA ana i teia au tutu. Te akaari maira i te au mate tataki tai ta Iehova i apai mai ki runga ia Aiphiti. I roto i te tutu mua ka kite koe ia Aarona e rutu ra i te Kauvai Nile ki tana rakau. I tona rave anga i te reira, kua riro te vai i roto i te kauvai ei toto. Kua mate te ika, e kua aunga kino te kauvai.

Aru mai, kua maani a Iehova i te au rana kia aere mai mei roto i te Kauvai Nile. Tei te au ngai ravarai ratou​—tei roto i te umu, te pa tunu kai, te roi o te tangata—​tei te au ngai ravarai. Te matemate anga te rana, kua akaputu mai to Aiphiti i te reira ki roto i te au putunga mamaata, e kua aunga kino te enua i te reira.

I reira kua rutu a Aarona i te one ki tana rakau, e kua riro mai te one pueu ei kutu. E au manumanu rikiriki teia e rere aere ana e e kakati ana. Ko te kutu te toru o te mate tei tupu ki te enua o Aiphiti.

Te au mate toe kua takino ua i to Aiphiti, kare i te ngati Iseraela. Te a o te mate e au rango mamaata tei akaki mai ki roto i te are o to Aiphiti pouroa. Kua tupu te rima o te mate ki te au manu. E manganui te puakatoro, te mamoe e te puakanio a to Aiphiti i mate.

Aru mai, kua rave a Mose raua ko Aarona i te reu ai e kua titiri ki roto i te reva. Kua akatupu te reira i te ee kino ki runga i te tangata e te manu. Ko te ono teia o te mate.

Muri ake i tera, kua akateitei a Mose i tona rima ki te rangi e kua tuku mai a Iehova i te mangungu e te ua toka. Ko te uriia ua toka kino roa atu te reira i tupu ki Aiphiti.

Ko te varu o te mate ko tetai pupu tapaki maatamaata. Kare rava i kitea ana te tapaki mei teia te maata i mua ana e mei te reira taime mai. Kua kai ratou i te au apinga ravarai kare i akapouia e te ua toka.

Te iva o te mate ko te poiri. E toru ra i te poiri ua anga te enua, kareka te ngai e noo ra te ngati Iseraela te marama ua ra.

I te openga, kua akaue te Atua i tona iti tangata kia pipi i te toto o tetai punua puakanio me kore punua mamoe ki runga i te poupou o to ratou ngutupa. Kua na runga mai i reira te angera a te Atua ia Aiphiti. Te kite anga te angera i te toto, kare aia i ta i te tangata i roto i te reira are. I roto pouroa ra i te au are kare e toto i runga i te poupou o te ngutupa, kua tamate te angera a te Atua i te au tama mua a te tangata e te au punua mua a te manu. Ko te mate 10 teia.

Muri ake i teia mate openga, kua akaue a Pharao i te ngati Iseraela kia aere. Kua papa takere te iti tangata o te Atua i te aere, e i taua po rai kua akamata ratou i te akaruke ia Aiphiti.