Tantara 32

Loza Folo

HENTEO moa sary io. Mampiseho loza nalefan’i Jehovah ta-Ejipta tao ty kiraidraike amin-droze reo. Hitantsika amy sary voalohane eo Arona mamàngo Ranon’i Neily io ami’ty tehine. Nanjary lio rano iny laha fa bakeo. Nimaty iaby ty fia tanatine tao, ka nimantsy rano iny.

Bakeo, le nasian’i Jehovah tsabokétra niboake baka anaty rano ao. Ze tany nandehàna le nifeno tsabokétra iaby: ndra tamy fanamboara mofo io, ndra tanaty valàny, ndra tanabo kitrely teny. Laha fa nimaty iaby tsabokétra reny, le navori’ty Ejipsiana tan-tany raike, ka le nimantsy bibike tanà iny.

Laha fa vita zay, le novangòan’i Arona ty tany ka niova ho moky ty lemboke. Biby kelikele mitìly sady manehitse raha reny. Io ty loza fahatelo ta-Ejipta tao.

Nisy loza hafa nahazo ty Ejipsiana avao fa tsy nahavoa ty Israelita mihitsy. Nifeno lalitse bevata iaby ty tranon’Ejipsiana; io ty loza fahaefatse. Ty biby ro nivòa, tamy loza fahalimy. Maro ty karazam-biby nimaty, ka tanaty raha zay ty aondry noho ty aosin’Ejipsiana reo.

Bakeo, nangalake lavenoke Mosesy noho Arona ka nanorake aze tamy rivotse teny. Nanjary nisy bay raty ty olo noho ty biby. Io ty loza fahaeny.

Tafara raha zay, le natsangan’i Mosesy tan-danitse ane ty tanane, ka nandefa varatse noho havandra Jehovah. Mbo tsy nisy havandra be nanahake an’io ta-Ejipta tao bakany bakany zay.

Valala maro biby, ty loza fahavalo. Mbo tsy nisy valala maro biby nanahake zay taloha noho tafara fotoa io. Nihàny valala reo iaby ty kila raha tsy nosimbà’ty havandra.

Naìky biby ta-Ejipta tao, zay ty loza fahasivy. Naìky tanaty telo andro tanà io, fe tamin’Israelita reo tao avao ro nazava.

Farane, le nivòla tamin’Israelita reo Andranahare mba hanisy lion’anak’aosy na lion’anak’aondry tamy tolàm-baravaran-droze teo. Bakeo, nisy anjeli-Ndranahare nandalo ta-Ejipta tao. Ka laha fa nahita lio tamy varavara teny anjele io, le tsy namono ze raha tao mihitsy. Fa ze trano tsy nahitan’anjele io lio, le novonòne iaby ze naterake voalohane tao ndra biby io ndre olo. Io ty loza fahafolo.

Novolànin’i Farao Israelita reo mba handeha, tafara loza farane io. Niala ta-Ejipta tao tamy andro halike iny avao ty Israelita, satria fa paré roze.

Eksodosy toko faha-7 zisiky amy toko faha-12.