HAREE dezeñu sira-neʼe. Dezeñu ida-ida hatudu malisan ida neʼebé Jeová fó ba Ejitu. Iha dezeñu primeiru ó bele haree Aarão baku Mota Nilu ho ai-tonka. Kuandu nia halo nuneʼe, bee tomak sai raan. Ikan sira mate, no mota sai dois.

Tuirmai, Jeová halo manduku sira sai husi Mota Nilu. Manduku sira-neʼe mosu iha fatin hotu—iha ahi-matan laran, iha sanan laran, iha toba-fatin—iha fatin hotu. Kuandu manduku sira-neʼe mate, ema Ejitu hada hamutuk iha fatin barak, no Ejitu tomak sai dois.

Depois, Aarão baku rai ho nia ai-tonka no rai-uut neʼe sai lalar kiʼik. Lalar kiʼik sira-neʼe sona ema. Sira mak malisan ba dala tolu ba rai Ejitu.

Malisan sira seluk kona ema Ejitu deʼit, laʼós ema Izraél. Malisan ba dala haat mak lalar boot barak tebetebes neʼebé semo tama ema Ejitu nia uma hotu. Malisan ba dala lima kona animál sira. Ema Ejitu nia karau no bibi barak mate.

Tuirmai, Moisés no Aarão foti no soe akudesan ba anin. Akudesan neʼe halo kanek mosu iha animál no ema. Ida-neʼe mak malisan ba dala neen.

Depois, Moisés hiʼit nia liman ba lalehan, no Jeová haruka udan-fatuk ho rai-tarutu. Udan-fatuk hanesan neʼe nunka mosu iha Ejitu.

Malisan ba dala ualu mak gafañotu barak tebetebes. Barak hanesan neʼe nunka mosu. Sira han buat hotu neʼebé udan-fatuk seidauk sobu.

Malisan ba dala sia mak rai-nakukun. Durante loron tolu rai tomak nakukun loos, maibé iha ema Izraél nia fatin naroman iha.

Ikusmai, Maromak haruka nia povu tau bibi-oan nia raan iha odamatan leten no riin. Depois, Maromak nia anju liu rai Ejitu. Kuandu anju haree raan neʼe, nia la oho ema ida iha uma neʼe nia laran. Maibé, iha uma hotu neʼebé la iha raan iha odamatan leten no riin, Maromak nia anju oho ema no animál nia oan primeiru. Ida-neʼe mak malisan ba dala sanulu.

Depois malisan ikus neʼe, Faraó haruka ema Izraél sai husi Ejitu. Maromak nia povu prontu, no iha kalan neʼe kedas sira sai.