Makani 32: Zipenzyo Zili 10
LANGA azifwanikiso. Acimwi citondezya cipenzyo Jehova ncaakaletela bana Ijipiti. Acifwanikiso cakutaanguna ulakonzya kubona Aloni nkwauma Mulonga wa Nailo ankoli. Mbwaaumina buyo meenda asanduka kuba bulowa. Nswi zyafwa amulonga watalika kununka.
Kumane Jehova wakapa kuti bacula bazwe mu Mulonga wa Nailo. Bakeenda ceendeende muzitofwu, muzyiko, muzibiya alimwi amumalo—inzya koonse-koonse. Nibakafwa bacula, bana Ijipiti bakabalundika eelyo nyika yoonse yakali kwiile kununka bacula.
Kumane Aloni wakauma ansi ankoli yakwe, alimwi lusuko lwakasanduka kuba masenya. Masenya cakali cipenzyo catatu mu Ijipiti.
Zyoonse zipenzyo zyakali kupenzya buyo bana Ijipiti ikutali bana Isilayeli. Cane cakali cipenzyo canziniini zipati-pati zyakali kuuluka akunjila mumaanda oonse abana Ijipiti. Cipenzyo casanu cakapenzya zivwubwa. Ibunji bwaŋombe, mbelele ampongo zyabana Ijipiti zyakafwa.
Kumane, Musa a Aloni bakabweza mulota akuuwaala mujulu. Bakaba azilonda zipati bantu alimwi azivwubwa. Eeci cakali cipenzyo cacisambomwe.
Amane Musa wakatambika janza lyakwe mujulu, Jehova wakaleta mvwula yacikulamabwe yakali kuzuma akulaba. Yakali njemvwula yakainda kubija mu Ijipiti.
Cipenzyo calusele cakali cansozi zipati-pati. Taku nikwakali nsozi zinji boobu munyika. Zyakalya kufwumbwa eeco cakacaala kumvwula yacikulamabwe.
Cipenzyo cafwuka cakali camudima. Kwamazuba otatwe kwakali mudima uusiya mbi, pele bana Isilayeli bakali mumumuni.
Kumamanino, Leza wakaambila bantu bakwe kusansaila bulowa bwakana kapongo naa kambelele amilyango yabo. Kumane mungelo wa Leza wakainda mu Ijipiti. Mungelo naakali kubona bulowa, tanaakali kujaya muntu muŋanda eeyo. Mumaanda oonse aatakajisi bulowa amulyango, mungelo wa Leza wakajaya bana babantu ababanyama bataanzi kuzyalwa. Eeci cakali cipenzyo ca 10.
Nicakainda cipenzyo eeci camamanino, Falawo wakabaambila bana Isilayeli kuti baunke. Bantu ba Leza boonse bakali libambide kuunka, ngeena masiku aayo bakatalika kugweta kuzwa mu Ijipiti.
Kulonga caandaano 7 kusikila ku 12.
Mibuzyo
- Kwiinda mukubelesya zifwanikiso zili waawa, pandulula zipenzyo zyotatwe zyakutaanguna Jehova nzyaakaleta mu Ijipiti.
- Nkwiindana kuli buti kwakaliko kuzipenzyo zyotatwe zyakutaanguna alimwi azyeezyo zimwi?
- Ncipenzyo nzi cakali ca 4, 5 a 6?
- Pandulula cipenzyo ca 7, 8 a 9.
- Ncinzi Jehova ncaakabaambila bana Isilayeli kucita katanaleta cipenzyo ca 10?
- Ncinzi cakali cipenzyo ca 10, alimwi ncinzi cakacitika nicakamana kucitika?
Mibuzyo aimwi
- Bala Kulonga 7:19-8:23.
Nikuba kuti bapaizi basimasalamuzi babana Ijipiti bakakonzya kucita maleele ngeena Jehova ngaakacita aakutaanguna obilo, ino ncinzi ncibakazumina nibayanda nibatayandi kumaleele aatatu? (Kul. 8:18, 19; Mt. 12:24-28)
Mbuti maleele aa 4 mbwaakatondezya nguzu Jehova nzyajisi zyakukwabilila bantu bakwe, alimwi mbuti kuzyiba makani aaya mbwaabagwasya bantu ba Leza nibasikilwa “mapenzi ayo mapati” aakasinsimwa? (Kul. 8:22, 23; Ciy. 7:13, 14; 2 Mak. 16:9)
- Bala Kulonga 8:24; 9:3, 6, 10, 11, 14, 16, 23-25; a 10:13-15, 21-23.
Ninkamu nzi zyabantu zyobilo zyakasikilwa Zipenzyo zili 10, alimwi mbuti eeci mbocikujatikizya mbotuzyibona nkamu eezyi zyobilo? (Kul. 8:10, 18, 19; 9:14)
Mbuti bbuku lya Kulonga 9:16 mbolitugwasya kubona kaambo Jehova ncamulekela Saatani kuti kaciliko kusikila sunu? (Balo. 9:21, 22)
- Bala Kulonga 12:21-32.
Mbuti Pobwe lya Kwiindilila mbolyakapa kuti bantu banji bakonzye kufwutuka, alimwi nkufwutuka kuli buti ooku nkolyakali kwaamba? (Kul. 12:21-23; Joh. 1:29; Balo. 5:18, 19, 21; 1 Kor. 5:7)
Andiza Inga Mwaakkomanina Ayaaya
IZYAKUCITILA ANTOOMWE NOMUKOMBA MUMUKWASYI
Leza Watuma Musa ku Egepita
Musa alimwi a Aroni bakatondezya busicamba nobakali kubandika a Farao singuzu. Amukkope zyakucita eezyi akuzibandika antoomwe mumukwasyi.
