KʼELA ja dibujoʼiki. Jujune wa sjeʼa jastal ja Jyoba ya koʼuk ja desgrasya ja bʼa Egipto. Ja bʼa bʼajtan dibujo waxa wila ja Aarón sok ja snajbʼanteʼ wan smakʼjel ja jaʼ Nilo. Anto ja jaʼi pax chikʼ, ja chayiki chʼak chamuke sok ja jaʼi kʼe tubʼuk.

Tsaʼan, ja Jyoba skʼulan ja bʼa yojol ja jaʼ Nilo aʼeluk chʼuchʼik. Ja chʼuchʼiki chikan bʼa chʼakʼ ochtalaʼuke: bʼa horno wa xkʼulaxi ja pani, bʼa basija wa swotsʼowe chikan jasa, bʼa chʼat jumasaʼ, chikan bʼaʼa. Yajni ja chʼuchʼ jumasaʼ chʼak chamuke, ja ixuk winike bʼa Egipto chʼak stsom-e sok chʼak yaʼtalaʼuke wosan, sok ja chonabʼi kʼe tubʼuk.

Anto sok ja snajbʼanteʼ ja Aarón smakʼa ja luʼumi, sok ja stsʼubʼil luʼumi chʼak paxuk yal nuxik us wa xkʼuxwaniye. Ja it jaʼ waj ja yoxil desgrasya sjeka ja Dyosi.

Ja tuk desgrasyaʼiki kechan syajbʼese ja swinkil Egipto, pe miyuk ja israʼelenyoʼiki. Ja xchanili waj niwakik us chʼak ochtalaʼuke ekʼ bʼa snaje ja swinkil Egipto. Jaxa bʼa sjoʼil desgrasya ja koʼ sbʼaj xchamel ja xchanteʼeʼi. Jitsan ja bʼa swakaxeʼi, ja xchejeʼi sok ja xchiboʼeʼi chʼak chamuke.

Anto ja Moisés soka Aarón sjiptalaʼane lubʼe taʼanik ja bʼa ikʼi sok ja it ja swinkil Egipto el sbʼaje niwakik kʼoʼon sok ja xchanteʼeʼi. Ja it jani swakil desgrasya koʼ sbʼajeʼi.

Tsaʼan ja Moisés sjacha ja skʼabʼi bʼa nalan chaʼan, sok ja Jyoba ya ajyuk chawuk sok sjekakon niwak bʼat. Mini bʼa ekʼel jun jasunuk jastal jaw ja bʼa Egipto.

Ja swaxakil desgrasya waj jun niwan nole jachʼbʼen. Mini bʼa jun ekʼele ajyel ja it sok mixani bʼa ekʼa. Ja jachʼbʼeniki chʼak xchʼake ele ja jas mi xchʼakakan ja bʼati.

Ja bʼa sbʼalunil desgrasya koʼ kʼikʼinal. Oxe kʼakʼu lek kʼikʼbʼi ja chonabʼi, pe ja israʼelenyoʼiki ajyini yijlabʼe ja bʼa snajeʼi.

Tixa yala yabʼ ja xchonabʼ ja Dyosi a-sbʼale yi ja yojyal spwertaʼe sok ja schikʼel jun yal chej ma jun yal chibo. Anto ja yanjel ja Dyosi ekʼ ja bʼa Egipto. Yajni ja anjel wa xyila ja chikʼi, mi maʼ smilakan ja bʼa naʼits jaw. Pe ja bʼa pwertaʼik mi bʼalubʼaluki, wa smilakan ja bʼajtan alatsi soka bʼa chanteʼi. Ja it jaʼ waj ja slajunil desgrasya.

Tsaʼan ja bʼa slajunil desgrasya ja faraón tixa sjeka awajuke ja israʼelenyoʼiki. Ja yeʼnleʼi naka chapanexaniʼa sok ja akʼwalil jaw chʼak eluke ja bʼa Egipto.