БО чуруктарны көрүп көрем. Чурук бүрүзүнде Иегованың Еги́петче чоруткан 10 шаажының бирээзин көргүскен. Бир дугаар чурукче көрем — Ааро́н даянгыыжы-биле Нил хемни хап тур. Ынчангаш хемниң суу хан апарган. Шупту балыктар өлүп калган, а хемден бак чыт үнүп эгелээн.

Дараазында бөзүр-пагалар болган: Иегованың дужаалы-биле олар Нил хемден үнүп келген. Олар каяа турбаан дээр: печкаларда, паштарда, кижилерниң дөжээнде,— өскээр чугаалаарга, кайда-даа. Бөзүр-пагалар өлүп каарга, еги́петчилер оларны улуг оваалар кылдыр чыып каарга, чер олардан чыдый берген.

Ооң соонда Ааро́н даянгыыжы-биле черни согарга, доозун хүлчүктер кылдыр хуула берген. Хүлчүктер дээрге аарышкылыг кылдыр ызырар хензиг сээктер-дир. Олар Еги́петче чоруткан үш дугаар шаажы болган.

Шупту арткан шаажылар чүгле еги́петчилерге хора чедирген болгаш изра́ильчилерге көңгүс дегбээн. Дөрт дугаар шаажы улуг ымыраалар болган, олар хөй өөрү-биле еги́петчи бүрүзүнүң бажыңынче киир ужуп турган. Бешки шаажыны дириг-амытаннарже чоруткан болган. Ол шаажыдан еги́петчилерниң инектери, хойлары база өшкүлери дыка хөй өлген.

Оон Моисе́й биле Ааро́н хүлдү алгаш, агаарже чажыпкан. Ол чүүл кижилерге база дириг амытаннарга коргунчуг ириңниг балыглар тывылдырган. Алдыгы шаажы ындыг болган.

Ооң соонда Моисе́й холдарын көдүрүптерге, Иегова диңмирээшкин биле долу чоруткан. Ол Еги́петтиң төөгүзүнде эң коргунчуг дээн долулуг диңмирээшкин-кызаңнааштыг чаъс болган.

Сески шаажы — шартылааларның канчаар-даа аажок хөй дүк-түмен шерии болган. Ооң мурнунда-даа, ооң соонда-даа черле ындыг хөй шартылаа турбаан. Долу соонда арткан үнүштерниң дөгерезин олар чедир чипкеннер.

Тоску шаажы дүмбей караңгы болган. Үш хүн дургузунда чер дүмбей караңгыга хөме алдырган болган, ынчалзажок изра́ильчилерниң чурттап турган черинде биеэги олчаан чырык турган.

Сөөлүнде Бурган чонунга бажыңнарының эжииниң кастыктарын хураган азы анай ханы-биле чаап алыр кылдыр чугаалаан. Ооң соонда Бурганның төлээзи Еги́петти эргээн. Дээрниң төлээзи хан көстүп турган бажыңдан кымны-даа өлүрбейн турган. Ынчалза-даа эжик кастыктарында кайда хан чок-тур, дээрниң төлээзи дун бооп төрүттүнген кижини болгаш дириг-амытанны өлүрүп турган. Ол 10-гу шаажы болган.

Сөөлгү шаажы эрте бээрге, фарао́н изра́ильчилерге чоруптарын дужааган. Бурганның бүгү чону белен турган, ынчангаш ол-ла дүне ол Еги́петтен үнүпкен.