Esapulo 32: Ekũi Liafengi
KŨLĨHISA vociluvialuvia cilo afengi Yehova a tuma vofeka Yegito. Ndomo ci molẽha vociluvialuvia eci ca tete, Arone o kasi loku veta ombueti yaye kilu liovava. Onduko yolui luaco, Nilu. Eci eye a veta ombueti yaye kilu liovava, ovava osi a pongoloka osonde kuenje olõsi viosi via kalamo via fa. Kuenda volui mua fetika oku tunda elemba lĩvi.
Noke Yehova wa tuma anonga oku tunda Volui Nilu. Anonga aco a lamanela toke vofeka yosi Yegito. A lamanela volofolono viavo, vovimanda vioku panga olombolo kuenda volohondo viavo vioku pekela. Eci anonga aco a fa, ofeka yosi Yegito yeyuka elemba lĩvi.
Noke Arone wa veta ombueti yaye posi kuenje oneketela yosi ya pongoloka olona. Olona ovio via kala efengi lia tatu vofeka Yegito.
Afengi aco eya oku veta lika va Egito okuti va Isareli havoko. Efengi lia kuãla lia kala olonyi okuti via iñila toke kolonjo viosi via va Egito. Efengi lia tãlo lia veta lika ovinyama. Ovinyama via va Egito olomeme lolohombo, viosi via fa.
Noke Mose la Arone va tikula etiko kuenje va li waya vilu. Etiko liaco lia kokela omanu ovipumbu lovisimbimbi kumosi lovinyama. Eli olio lia kala efengi liepandu.
Noke liovina evi, Mose woluĩla ovaka aye kilu kuenje Yehova wa tuma ocilemĩlo lociwe. Ociwe caco ka ca la pita handi vofeka Yegito.
Yehova weya oku tuma efengi liecelãla. Efengi liaco lia kala apange. Vofeka Yegito ka mua la pita afengi aco. Apange aco eya okulia ovina viosi via supa kociwe.
Efengi lieceya lia kala owelema. Vofeka Yegito mua kala owelema vokuenda kueci ci soka oloneke vitatu. Pole va Isareli va kuata ocinyi.
Noke Suku wa sapuila omanu vaye oco va nyile osonde yo kahombo ale yo kameme kovikuli viapito avo. Ungelo wa Suku wa pita kolonjo viosi via va Egito. Eci a mola osonde kovikuli violonjo via va Isareli, eye ka iñilile oku ponda olonuñulu viavo. Pole, volonjo viosi ka mua kaile osonde, ungelo wa Suku wa ponda olonuñulu viosi ci kale viomanu ci kale viovinyama. Eli olio lia kala efengi liekũi.
Noke liefengi eli, Fareo wa sapuila va Isareli oco va tunde vofeka yaye. Vuteke waco haico va Isareli va tunda vofeka Yegito kuenje va fetika ungende wavo.
Etundilo kocipama 7 toke 12.
Apulilo
- Tala vociluvialuvia. Kaliye tukula afengi atatu a tete Yehova a tumĩle Kegito.
- Afengi atatu a tete a litepele ndati lafengi akuavo eya oku kuamamo?
- Lipi lia kala efengi liakuãla, liatãlo, leli liepandu?
- Tukula efengi liepanduvali, liecelãla kuenda liecea.
- Eci efengi liekũi handi ka lieyile nye Yehova a sapuilile va Isareli okuti oco va sukilile oku linga?
- Lipi lia kala efengi liekũi? Kuenda noke yefengi liaco nye ceya oku pita?
Apulilo akuavo
- Tanga Etundilo 7:19-8:23.
Vakualumbu o Kegito va tẽla oku setukula afengi avali a tete. Pole eci kua pita efengi liatatu ovo veya oku limbuka nye? (Etu. 8:18, 19; Mat. 12:24-28)
Efengi liakuãla lia lekisa ndati okuti Yehova o tẽla oku teyuila omanu vaye? Kuenda oku kũlĩha ulandu owu ci kolisa ndati omanu va Suku osimbu va lavoka ‘ohali yapiãla’? (Etu. 8:22, 23; Esit. 7:13, 14; 2 Asa. 16:9)
- Tanga Etundilo 8:24; 9:3, 6, 10, 11, 14, 16, 23-25 kuenda 10:13-15, 21-23.
Ovimunga vipi vivali via kuatiwa Lafengi Ekũi? Kuenda ovimunga viaco koloneke vilo vi sokisiwa la nye? (Etu. 8:10, 18, 19; 9:14)
Elivulu Lietundilo 9:16 li tu kuatisa ndati oku limbuka esunga lieci Yehova a kasilili oku ecelela Satana oku amamako toke cilo? (Va Rom. 9:21, 22)
- Tanga Etundilo 12:21-32.
O Paskoa ya kuatisa ndati oku yovola omanu valua? Kuenda o Paskoa ya kala ocindekaise ce? (Etu. 12:21-23; Yoa. 1:29; Va Rom. 5:18, 19, 21; 1 Va Kor. 5:7)
