KITAA an mga retrato. An tagsa hito nagpapakita han peste nga iginpadapat ni Jehova ha Ehipto. Ha siyahan nga retrato, makikita mo nga iginlamba ni Aaron an iya tungkod ha Salog Nilo. Han ginbuhat niya ito, nagin dugo an tubig ha salog. Salit, nagkamatay an mga isda, ngan nagbaho an salog.

Sunod, ginpagawas ni Jehova an mga pakla tikang ha Salog Nilo. Nagkaada hin mga pakla ha ngatanan nga lugar—ha mga hudno, karaha, higdaan, ngan ha bisan diin. Han nagkamatay an mga pakla, gintambak ito han mga Ehiptohanon, ngan nagbaho an bug-os nga nasud.

Katapos, iginlamba ni Aaron ha tuna an iya tungkod, ngan an tapotapo nahimo nga mga tagnok. Gudtiay ito nga insekto nga nalupad ngan nangangagat. Ito an ikatulo nga peste ha Ehipto.

Mga Ehiptohanon la an naapektohan han sumunod nga mga peste, diri upod an mga Israelita. An ikaupat nga peste amo an dagku nga langaw nga nagkasulod ha balay han ngatanan nga Ehiptohanon. An ikalima nga peste nakadaot ha mga hayop. Damu nga kabakahan, kakarnerohan ngan kakandingan han mga Ehiptohanon an nagkamatay.

Sunod, nagkuha hira Moises ngan Aaron hin agbon ngan iginsabrag ito tipaigbaw. Tungod hito, nagkaada maul-ol nga mga hubag an mga tawo ngan hayop. Ini an ikaunom nga peste.

Katapos hito, gin-alsa ni Moises an iya kamot, ngan nagpadara hi Jehova hin mga dalugdog ngan graniso. Ito an pinakamakusog nga bagyo hin graniso ha bug-os nga kasaysayan han Ehipto.

An ikawalo nga peste amo an daku nga panon han mga duron. Hito pa gud la nga panahon nagkaada hin sugad kadamu nga duron. Ginkaon hito an ngatanan nga waray madaot han mga graniso.

An ikasiyam nga peste amo an kasisidman. Tulo ka adlaw nga madulom gud an nasud, kondi malamrag ha lugar han mga Israelita.

Ha kataposan, ginsugo han Dios an iya katawohan nga magwisik hin dugo han nati nga kanding o karnero ha mga poste han ira purtahan. Katapos, inagi ha Ehipto an anghel han Dios. Kon nakikita han anghel nga may-ada dugo an purtahan, waray hiya ginpapatay hito nga balay. Kondi ha ngatanan nga balay nga waray dugo an mga poste, ginpapatay niya an suhag han mga tawo ngan hayop. Ini an ika-10 nga peste.

Katapos hinin ultimo nga peste, ginpalakat ni Paraon an mga Israelita. Andam na ha paglakat an katawohan han Dios, ngan hito mismo nga gab-i nagmartsa hira tipagawas ha Ehipto.