Antambo Folo Ta Ejipta
Tantara 32
Antambo Folo Ta Ejipta
ZAHAVA baka sary aby io. Irô jiaby io antambo nalefan’i Jehovah ta Ejipta. Amy sary voanalohany, Arona mamepiky Ten̈aranon’i Neily amy tongozonany. Izy koa fa nan̈ano zen̈y, ten̈arano in̈y nivadiky lio. Laoko jiaby naty, baka iô rano nantsin̈y.
Fan̈araka zen̈y, nataon’i Jehovah nisy radaka maro boaka tamy Ten̈aranon’i Neily tao. Feno radaka tany jiaby: tamy raha fan̈amboaran̈a môfo, tamy vilan̈y, tamy kibàny. Radaka aby in̈y koa fa naty, navorin’Ejipsianin̈y aby io. Tany jiaby nantsin̈y.
Baka iô, Arona namepiky faotaka tamy tongozo, ke faotaka nibôn̈o in̈y nanjary môko. Irô io biby madiniky mitilin̈y sady man̈ekitry. Môko antambo fahatelo nalefan’ny Zan̈ahary ta Ejipta.
Ejipsianin̈y fo navoa antambo fito tavela fa tsy Israelita. Antambo fahefatra, lalitry maventy. Feno lalitry tan̈aty tran̈on’Ejipsianin̈y. Biby fo navoa antambo fahadimy. Naro aomby ndreky ôndrikôndriky ndreky bengin’Ejipsianin̈y naty.
Fan̈araka, Mosesy ndreky Arona nangala jôfo natsipin-drô tamy tsiko. Olo jiaby ndreky biby jiaby nanjary baibay. Zen̈y antambo fahatsiaota.
Koa fa natsangan’i Mosesy tan̈anany nanôndro lan̈itry, Jehovah nandatsaka varatra ndreky mahalen̈y be. Zen̈y mahalen̈y farany mare, sady nandroba-draha eky ta Ejipta.
Kijeja antambo fahavalo. Tsiary nisy kijeja maro be karaha zen̈y. Zay raha naniry tsy naty tamy mahalen̈y be in̈y, lanin’ny kijeja.
Baka iô, nahiziky be tamy tany nisy Ejipsianin̈y tao, tan̈atin’ny telo andra. Kanefa tamin’Israelita aby io nazava fo. Zen̈y antambo fahasivy.
Farany amy zay, Zan̈ahary nan̈iraka olonany han̈ôsotro lion’ny bengy na lion’ôndrikôndriky tan̈abon’ny varavaran̈an-drô. Anjelin’ny Zan̈ahary koa fa nandalo ta Ejipta, ke nahita lio in̈y, tsy nivoneny olo tan̈aty tran̈o tao. Tamy varavaran̈a tran̈o tsisy lio fo, anjelin’ny Zan̈ahary namono talan̈olon’olo ndreky biby jiaby. Zen̈y antambo fahafolo.
Tafaran’antambo fahafolo io, Farao nandefa Israelita aby io. Olon’ny Zan̈ahary tamy zen̈y fa vôn̈ono handeha. Alin̈in’izin̈y fo irô fa niala ta Ejipta.
Eksodosy toko faha-7 ziska toko faha-12.
