Ngolo Nam Makwar
Ododo 33
Ngolo Nam Makwar
NEN kong gin ma tye ka timme-ni! Meno aye Moses ma oryeyo odoone i wi Nam Makwar. Jo ma en tye kwedgi mot labongo ayela loka nam tung ca-ni gubedo Luicrael. Ento Parao ki monnye ducu aye gitye ka mwony woko i dye nam-mi. Wanenu kit ma man otimme kwede.
Kit ma wapwonyo kwede, Parao owaco ki Luicrael me a woko ki i Ejipt i kare ma Lubanga okelo pwod me 10 i kom Luejipt. Co me Icrael ma welgi cokcok 600,000 gua, kacel ki mon wa ki lutino mapol. Medo i kom meno, jo mukene ma welgi pol ata, me rok mukene, ma guye Jehovah, gua kacel ki Luicrael. Gin ducu guwoto ki romi ki dyegi wa ki dyangigi.
Ma peya gua, Luicrael gupenyo Luejipt pi bongngi ki jami ma kiyubo ki jabu ki ryal. Luejipt gudoko lwor adada, pi pwod me agikki ma opoto i komgi-ni. Pi meno gin gumiyo Luicrael gin ducu ma gupenyo.
I nge nino manok Luicrael guo i Nam Makwar. Gin guywe kunnu. I kare ma onongo gitye ka yweyo, Parao ki jone gucako paro gin ma omiyo giweko Luicrael gua woko. Gin guwaco ni: ‘Waweko opiiwa gucito woko!’
Pi meno Parao oloko tamme dok odoco. Oyotoyot en oyubo monnye woko ki gadigadi me lwennye. Ci en ocako ryemo kor Luicrael ki gadigadine 600 ma tetgi dok pat, kacel ki gaddigadi mukene ducu me Ejipt.
Luicrael gudoko lwor tutwal i kare ma guneno Parao ki monnye ka gibino ki i ngegi. Ka ngwec onongo pe. Nam Makwar onongo tye i butgi tungcel, ci gin dok guneno Luejipt ka gibino ki tung ka mukene-ni. Ento Jehovah oketo pol i kin jone gin ki Luejipt. Pi meno Luejipt onongo pe giromo neno Luicrael me lweny i komgi.
Ci Jehovah owaco bot Moses ni orye odoone i wi Nam Makwar. I kare ma en otimo, Jehovah oweko yamo okodo matek ki tung kunyango. Pii me nam-mi opokke iye aryo, ci piine ocung tung ryoryo
Ci Luicrael gucako wot i dye nam i wi ngom mutwo. Otero cawa mapol pi dano milion mapol kacel ki leegi ducu me kato labongo peko mo ki i dye nam wa loka tung ca. I nge meno Luejipt dok guneno Luicrael odoco. Opiigi onongo dong gitye ka lwi woko! Pi meno gin gumwomme i korgi i dye nam.
I kare ma gudonyo i korgi, Lubanga oweko lawala tyen gadigadigi opoto woko. Luejipt gudoko lwor tutwal ci gucako koko ni: ‘Jehovah tye ka lweny i komwa pi Luicrael. Walwiyu woko ki kany!’ Ento kare onongo dong pe.
Man aye kare ma Jehovah owaco ki Moses me ryeyo odoone i wi Nam Makwar, kit ma ineno kwede i cal-li. Dok i kare ma Moses otimo meno, kicika me pii ocako dwogo cen ci oumo Luejipt ki gadigadigi. Mony ducu onongo gulubo kor Luicrael i dye nam. Dok Laejipt mo kadi ki acel pe okatti woko makwo!
Kit ma jo pa Lubanga ducu cwinygi obedo yom kwede pi bwot! Co guwero wer me pwoc bot Jehovah ni: ‘Jehovah oloyo lweny ki deyo adada. En obolo aguragura ki jo ma gingweco kwedgi i dye nam.’ Miriam lamin Moses okwanyo ajaane, ci mon ducu gulubo kore ki ajaagi. Ma onongo kun gimyelo ki yomcwiny, gin guwero wer ma rom aroma ki pa co ni: ‘Jehovah oloyo lweny ki deyo adada. En obolo aguragura ki jo ma gingweco kwedgi i dye nam.’
