Maana 33nan

Kɔgɔji Bilen tigɛli

E K’A filɛ ko min bɛ ka kɛ sisan! Musa de bɛ k’a ka bere yankan Kɔgɔji Bilen kunna. A ni mɔgɔ minnu bɛ ɲɔgɔn fɛ, kɔgɔji fan dɔ fɛ, olu ye Israɛlkaw ye. Olu kisira. Nka, Faraon ni a ka kɛlɛbolo mumɛ tora kɔgɔji la. O kɛra cogo min na, an k’o lajɛ ɲɔgɔn fɛ.

An y’a kalan maana tɛmɛnen na ko Ala kɛlen kɔ ka tɔɔrɔko tannan bin Misirakaw kan, Faraon ko Israɛlkaw ka taa ka bɔ Misira. Israɛl cɛ minnu bɔra Misira ka taa, olu tun bɛ taa mɔgɔ 600 000 la, musow ni denmisɛnw tun sen tɛ o la. Mɔgɔ camanba wɛrɛw dara Jehova la. Olu fana farala Israɛlkaw kan, ka bɔ Misira. U bɛɛ lajɛlen ye u ka sagaw, u ka baw, ni u ka misiw ta ka taa.

Nka, sani Israɛlkaw ka taa, u ye finiw ɲini Misirakaw fɛ ani fɛn  wɛrɛw fana minnu dilanna ni sanu ni warijɛ ye. Tɔɔrɔko tannan min binna Misirakaw kan, o ye Misirakaw lasiran kosɛbɛ. O de y’a to, Israɛlkaw ye fɛn o fɛn ɲini u fɛ, Misirakaw ye o fɛnw bɛɛ di u ma.

Tile damadɔ kɔfɛ, Israɛlkaw sera kɔgɔji da la min bɛ wele ko Kɔgɔji Bilen. U tora yen k’u sɛgɛnnafiyɛn . Nka o waati kɔnɔna na, Faraon ni a ka cɛw nana nimisa, bawo u ye Israɛlkaw bila ka taa. U ko: ‘An ye mun kɛ tan? An y’an ka jɔnw to ka taa!’

Faraon hakili yɛlɛmana tuguni Israɛlkaw ta fan fɛ. A y’a teliya ka a ka kɛlɛkɛwotorow ni a ka kɛlɛbolo labɛn. Faraon wulila ka Israɛlkaw nɔgɛn ni kɛlɛkɛwotoro kɛrɛnkɛrɛnnen 600 ani ni Misira kɛlɛkɛwotoro tɔw bɛɛ ye.

 Israɛlkaw ye Faraon ni a ka sɔrɔdasikulu natɔ ye u nɔfɛ tuma min na, u siranna kosɛbɛ. Boliyɔrɔ si tun tɛ u bolo. Kɔgɔji Bilen tun bɛ fan kelen fɛ, Misirakaw tun bɛ ka na fan dɔ fɛ. Jehova ye mun kɛ? A ye kabasen don a ka mɔgɔw ni Misirakaw cɛ, walisa Misirakaw kana se ka Israɛlkaw ye, k’u kɛlɛ.

Jehova tilala k’a fɔ Musa ye, ko a k’a ka bere yankan Kɔgɔji Bilen kunna. Musa ye o kɛ tuma min na, Jehova ye fiɲɛba dɔ bɔ kɔrɔn fɛ. O fyɛra kɔgɔji kan, fo ka a ji tila fila ye. O cogo la, jiw kɛra kogo fila ka jɔ, ka dugukolo jalan to u ni ɲɔgɔn cɛ.

Israɛlkaw taamana o yɔrɔ jalan de kan, ka kɔgɔji tigɛ o cogo la. Lɛrɛ caman tɛmɛna walisa o mɔgɔ miliyɔn caman ani u ka baganw bɛɛ ka se ka ji tigɛ hɛrɛ la, ani k’u yɛrɛw sɔrɔ kɔgɔji fan dɔ fɛ. O kɔfɛ, Misirakaw sera ka Israɛlkaw ye kokura. A tun bɛ u kɔnɔ halisa ko u ka jɔnw bolila. O kosɔn, Misirakaw y’u girin ka don jidingɛ kɔnɔ, Israɛlkaw nɔfɛ.

U donna kɔgɔji la tuma min na, Ala ye u ka wotorow senw bɔ. Misirakaw siranna kosɛbɛ. U ye kule daminɛ, ko: ‘An ka boli ka bɔ yan yɔrɔ la joona, bawo Jehova bɛ ka Israɛlkaw dɛmɛ k’an kɛlɛ.’ Nka, kow tun taara ka dan kɛ.

O tuma de la, Jehova y’a fɔ Musa ye ko a k’a ka bere yankan Kɔgɔji Bilen kunna. I ɲɛ bɛ o de la ja kan. Musa y’a ka bere yankan tuma min na, ji minnu tun jɔlen bɛ i ko kogobaw, olu seginna u nɔ na, ka Misirakaw ni u ka wotorow bɛɛ datugu. Ikomi Misirakaw ka kɛlɛbolo mumɛ tun donna Kɔgɔji la Israɛlkaw nɔfɛ, u bɛɛ lajɛlen tora ji la. Hali u kelen ma kisi.

Nisɔndiyaba tun don Ala ka mɔgɔw bolo, k’a ye ko u bɛɛ kisira. Cɛw ye dɔnkili da walisa ka barika da Jehova ye. U ko: ‘Jehova ye se sɔrɔ ni nɔɔrɔba ye. A ye sow ni sotigiw fili kɔgɔji la.’ Musa balimamuso Mariyama y’a ka dununnin ta, muso bɛɛ ni u ka dununninw tugura a kɔ, ka dɔn kɛ ni nisɔndiya ye. Cɛw ni musow tun bɛ ka dɔnkili kelen da ɲɔgɔn fɛ, ko: ‘Jehova ye se sɔrɔ ni nɔɔrɔba ye. A ye sow ni sotigiw fili kɔgɔji la.’

Ekisode tilayɔrɔba 12 ka na 15 la.