ZEIDAH a cang ti cu zoh hmanh u! Rili sen cung ah a ṭhiangṭhunh a hler mipa hi Moses cu a si. Amah he him tein varal khat lei i a um mi hna cu Israel mi hna an si. Sihmanhsehlaw Faraoh le a ralkap run cu rili chung ah an pil dih cang. Zeitindah mah cu a rak si zoh tuah u sih.

Kan hngalh cang bang in, Iziptmi hna cung ah Pathian nih rai phun hra nak a tlun ter hnu in, Faraoh nih Israel mi hna cu Izipt ram in chuah awk ah nawl a rak pek hna. Israel mi pa upa lawngte 600,000 cu nu le ngakchia tampi he an rak kal. Jehovah a rak zum ve mi midang tam pi zong Israel mi hna he cun an rak kal ve. An zapi in an tuu le an meheh le an caw kha an rak i kalpi dih hna.

An chuah hlan ah khan Israel mi hna nih Izipt mi hna kha hnipuan le sui le ngun in ser mi thil kha an rak hal hna. Izipt mi hna zong nih hmanung bik rai ruang ah khan an ṭih ngai cang hna. Cucaah Israel mi hna kha an hal mi hna paoh an rak pek hna.

Ni tlawmpal hnu ah Israel mi hna cu Rili Sen an hung phan. Cuka ah cun an rak i din. Cu lio te ah cun, Faraoh le a mi hna cu Israel mi an kal ter hna kha an i ngaichih ṭhan. ‘Kan sal hna kha kan luat ter hna ai!’ an ti.

Cucaah Faraoh cu a lung kha aa thleng ṭhan i, a ral tuknak rangleng le a ralkap kha a timh zokzok hna. Cu hnu ah a rangleng ṭhaṭha 600 le Izipt rangleng dang hna he Israel mi cu an hnu lei in a dawi ṭhan hna.

Faraoh le a ralkap bu nih an hnulei in an hun dawi hna kha an hmuh tik hna ah Israel mi hna cu an ṭih ngaingai. Zam khawhnak ding lam zong a um fawn lo. Khatlei kam in Rili Sen nih a kham hna i, hi lei ah Izipt mi hna an rak ra fawn. Sihmanhsehlaw Jehovah nih a mi hna le Izipt mi hna karlak ah minmei a chiah. Cucaah Izipt mi hna nih Israel mi hna kha doh khawh awk ah a hmuh hmanh an hmu kho ti hna lo.

Cu hnu ah Jehovah nih Moses cu a ṭhiangṭhunh kha Rili Sen cung ah hler awk ah a rak chimh. Moses nih a hler tik ah Jehovah nih nichuah lei thli kha a rak hran ter. Rili ti cu an i ṭhen i, ti cu an orhlei le an kehlei in vanpang bantuk in aa chong.

Cu tik ah Israel mi hna cu rili chung ah khan lei ro cung in an rak kal. Rili chung in khattelei kam ah minung nuai tampi le an saram vial te hna him tein va tan khawh awk ah cun suimilam tampi an rak rau lai. A donghnak ah Izipt mi hna nih Israel mi hna cu an hun hmuh ṭhan hna. An sal vialte an luat dih cang ai! Cucaah rili chung ah khan an ṭum ve i an hei dawi ṭhan hna.

Cutin an dawi tik hna ah cun Pathian nih an leng ke kha a tlonghter dih hna. Izipt mi hna cu an ṭih ngai cang i: ‘Jehovah nih Israelmi lei in kanmah cu a kan doh ko hi ta. Zam ko u sih!’ tiah an au. Sihmanhsehlaw a rak tlai tuk cang.

Hmanthlak i nan hmuh mi bang hin, Jehovah nih Moses cu a ṭhiangṭhunh kha Rili Sen cung ah hler awk ah a rak fial. Cun Moses nih a hler tik ah, ti vanpang hna cu an i tong ṭhan i Iziptmi hna le an rangleng vialte cu a khuh dih hna. Cu tik ah Izipt mi cu pakhat hmanh a nung in an luat lo!

Pathian miphun hna cu an zapi in an luat dih caah zeitluk in dah an rak i lawmh lai! Pa nih Jehovah sin ah lawmhnak hla an sak i: ‘Jehovah nih lianhngannak in a tei cang. Rangtum hna le a cittu hna cu rili chung ah a paih dih cang hna,’ an ti. Moses a u nu Miriam nih darchawn kha aa lak i, nu vialte nih khan an darchawn cio he an rak zulh. Lawmh nak in an lam pah in, pa hna nih an sak bang in hla kha an sak ve i: ‘Jehovah nih lianhngannak in a tei cang. Rangtum le aa cit mi hna cu rili chung ah a paih dih cang hna,’ an ti ve.