¡BE DAGGE ibmar gunaidi! Moisés suwar oyogwissi dermar Ginnidsig. Moisésbo dulemar obagsa bugmaladi, Israel dulemala, aggar gussurmarmogad. Auggine Faraón geb e soldadomarbo dina, gundulenanai. Anmar daggoena igi we ibmar gusa.

Iduar anmar durdasa yobi, boni sogambegid sorba Faraón, Israel dulemarga sogsa bemar Egiptogi nomarye. Bela Israel dulemar massergana 600.000 mergu nadmala, degine, omegan aggarba geb burwigan aggarba. Uggine buggidar bamalad Jehová bali nagusmarmogadi nadmarmoga. Bergwable Egiptog nodmargua na ovejamar, cabramar geb molimar sesmala.

Naed iduale, Israel dulemar Egipto dorganse mormar egissamala geb or sobarmalad, degine, mani sobarmalad. Egipto dorgan boni sogambegid emargi negdagsadba dobed yaisur iddomala. Degsoggu, Israel dulemar emarse ibmar egissamalad bela emarga ugsamala.

Aa ibagan sorbali Israel dulemar dermar Ginnidse owarmasmala. Wegine obunnosmala. Auggine, Faraón geb e sordagana binsaarmala ibiga anmar Israel dulemar barmisdibeye. Geb soggarmala: ‘¡Anmar maigan, anmar na barmisa!’.

Degsoggu, Faraón binsaed ogwasbarsunna. Yog e carro urwedgad nudaggaled geb e soldadomarga yog sogaled guaggwa buggumaloye. Degidgi, 600 mergu carromar bur nuegan sesa geb Israel dulemar balegiddesunna geb bela bamalad carromar sesbali.

Israel dulemar daggarmargua Faraón geb e sordagan emar gine danimala, nue gwaggismala. Geg wagginmalana. Soggwen siggi dermar Ginnid iduar naid, geb baidsigdi Egipto dorgan emargi danimalad. Auggine Jehová na e neggwebur geb Egipto dorgan inbagine mogir nasisa. Degsoggu Egipto dorgana geg bar Israel dulemar oaggalomala, ar dagsurmalana.

Emisgi Jehová, Moisésga soge suwar oyogoye dermar Ginnidsig. Moisés deyob imasgua, Jehová imasa dadnaggwe burwa binnasuli megega. Geb dermar argade, geb dermar abin bela gales nagusa.

Degiidgi Israel dulemar dermar abargi nadmarsunna, negdinnagwadgi. Millónba e dulemala mergu soggua geb ibdulamala buggidarbar soggua, yeer wadsi galesmala obaggega. Emisgi Egipto dorgangi Israel dulemar gannar magdagle gunonibali. ¡Emar maigan waggiddemala! Geb dermar sega agdedmarmoga, Israel dulemar baleginnega.

Egipto dorgan dermargi agdesmargua, Babdummad emar carromar nagmar ungemamai gueg imasa. Egipto dorgana yeer gwaggismala geb binnasur goddemala: ‘Jehová, Israel dulemar bina anmarbo urwenai. ¡Anmar gannar nae!’ Auggine bad sorbar gusa.

Degiidgi Jehová, Moisésga soge suwar dermar Ginnidsig oyoye, sobarnaidgi be dagsa yobi. Geb dermar muralla yobi galesnaidi Egipto dorgan birgi, geb emar carromar birgi gannar aryoarsunna. Bela e soldadomar dermar yaba dogsamala. ¡Wargwensaar durgussuli!

¡Ibiyob Babdummad neggwebur bendaglesadba wergusa! Massergan namasmala nuedye Jehovága sogega, wegi namasmala: ‘Jehová dummad obidsa. Molimar geb emar dulemar bela dermaryag barmedde’. Míriam, Moisés e buna, pandereta onosa, geb bela bamalad omegan anba ogollarmarmoga. Geb dodoar dodoar namasmala: ‘Jehová dummad obidsa. Molimar geb emar dulemar bela dermaryag barmedde’.