RAICA mada na ka e yaco tiko oqori! E dodoka tu nona ititoko o Mosese ina Wasa Damudamu nira sa yaco yani i tai kadua na Isireli. E luvu o Fero kei na nona mataivalu kece ena wasawasa. Meda raica mada se cava e vakavuna.

Eda se qai vulica ga oqo nona sereki ira na Isireli o Fero ni oti nona kuitalaki ira na Ijipita ena 10 na kuita lelevu na Kalou. Era biuti Ijipita e lewe 600,000 na tagane ni Isireli, era levu tale ga kina na yalewa kei na gone. Era muri ira tale ga e levu era sega ni Isireli, ia era sa mai vakabauti Jiova. Era kauta tale ga na nodra sipi, na me, na bulumakau, kei na manumanu tale e so.

Ni bera nodra lako era kerea na Isireli na isulu, na iyaya koula, kei na iyaya siliva mai vei ira na kai Ijipita. Era solia na ka kece oqori na kai Ijipita nira sa rui rerevaka vakalevu na ikatini ni kuita.

Ni oti ga e vica na siga era sa yacova yani na Isireli na Wasa Damudamu. Ra mai cegu toka kina. Sa qai curumi Fero kei ira na nona tamata na rarawa nira sa lako na Isireli. Era qai kaya, ‘Eda sa laiva na noda bobula mera lako!’

Sa baci veisau tale na loma i Fero. A vakarautaka sara na nona qiqinivalu kei na nona sotia qai cici muri ira yani na Isireli. E kauta e 600 na qiqinivalu kei na kareti kece ni Ijipita.

Era rere vakalevu na Isireli nira raica na ka oqo. E sega ni dua na vanua mera na dro rawa kina. Ni sa tu mai matadra na Wasa Damudamu, ra qai cici tiko yani e dakudra na kai Ijipita. A qai biuta o Jiova na o ena kedrau maliwa, mera kua kina ni raici ira se valuti ira nona tamata na kai Ijipita.

A qai kaya o Jiova vei Mosese me dodoka nona ititoko ina Wasa Damudamu. Oti oya sa qai cakava o Jiova me liwa mai e dua na cagi kaukaua. E tawase rua na wasawasa qai tao na wai ena kena iyalayala.

Era takoso rawa kina na Isireli ena qele mamaca. E vica vata na aua nodra takoso tiko na lewe milioni oqo kei na nodra manumanu. Ni sa kauta laivi o Jiova na o a tabonaki ira tu na Isireli, era kidacalataka na kai Ijipita nodra sa takoso tiko na Isireli. Sa ra dro na nodra bobula! Sega ni bera nodra sa cici muri ira yani.

Nira cici totolo yani, e cakava na Kalou me lutu tani na yava ni nodra qiqinivalu. Era domobula na kai Ijipita ra qai kailavaka: ‘Sa tiko dina vata kei ira na Isireli o Jiova qai vala ena vukudra. Meda dro!’ Ia e sa bera.

E keri sara ga sa tukuna kina vei Mosese o Jiova me dodoka na nona ititoko ina Wasa Damudamu, me vaka ga o raica toka oqori. Ni dodoka ga yani o Mosese, e suka tale na wai a sa tawase tu qai luvuci ira kece na kai Ijipita kei na nodra qiqinivalu. Era mate taucoko!

Era marau dina na tamata ni Kalou nira sa vakabulai! Era lagata na tagane na sere ni vakavinavinaka vei Jiova: ‘Sa kaukaua o Jiova ena ivalu. E viritaki ira na ose kei ira era vodoka tiko ena wasawasa.’ E liutaki ira na yalewa ena nodra meke ena tibereli o Miriama na gane i Mosese. Era qai lagata tale ga na sere vata ga era lagata tiko na tagane: ‘Sa kaukaua o Jiova ena ivalu. E viritaki ira na ose kei ira era vodoka tiko ena wasawasa.’