PIIRAKAA nümüin Moisés, niyalerüin nunuʼuse saaʼu tü palaa ishosükat. Na nümaakana naya na israeliitakana. Wüinsitshi Faraón otta na nümaajanakana. ¿Jamakuwaʼipat tia?

Watüjaaipa aaʼu nüjütüin Faraón na israeliitakana süchikijee tü poloosükat kasa mojusü. Oʼunushii 600.000 tooloyuu, eejatü jieyuu namaa, tepichi otta na egipcio anoujakana nünain Jeʼwaa. Namaasü namülüin, anneerü, kaaʼula otta paaʼa.

Süpülapünaa noʼunuin achuntushii naya kuluulu, kasa aainjuushi süka ooro otta pülaata namüin na egipciokana. Süka mmoluin na egipciokana sutuma tü poloosükat kasa mojusü naapüin namüin na israeliitakana tü nachuntakat.

Mapa nantaka na israeliitakana eemüin tü palaa ishosükat eere neemeraain. Mojuka naaʼin Faraón otta na nümaajanakana süka najütüin na israeliitakana. Namaka: ‹Jamüinjana wajütaka na wachepchiakana›.

Yapajaka nutuma Faraón neʼejena otta nusurulaatse, noʼunaka nachiirua na israeliitakana suluʼu 600 neʼejena.

Ainkuusü maʼin naaʼin na israeliitakana neʼrapa Faraón otta na nümaajanakana süka nnojoluin jalapünaainjanain nawataain. Eejatü tü palaakat napüleerua otta na egipciokana nachiiruajee. Niʼitaaka Jeʼwaa wanee siruma süpüla nnojoluin jaʼyain na israeliitakana.

Nuluwataaka Jeʼwaa Moisés sünain niyalerüin nunuʼuse saaʼu tü palaa ishosükat. Naainjapa shia, suwawatka wanee jouktai katchinshaatasü maʼin nutuma Jeʼwaa. Sujutalaaka tü palaakat otta sukumajaaka wanee wopu pasanainpünaa sünain.

Nalataka na israeliitakana pasanainpünaa sünain tü palaakat. Kamaʼashii süpüla nalatüin süka wainmain naya. Mapa neʼraka na egipciokana na israeliitakana, noushikaaka nachiirua.

Wattapa naya aakajaasü suuʼui neʼejena nutuma Maleiwa, nainkuuka aaʼin na egipciokana namaka sümaa naʼwaatüin: ‹Atkaashi Jeʼwaa wamaa naaʼujee na israeliitakana. ¡Jooʼuya yaajee!› Nnojoluipa süpüla naainjüin tia.

Nuluwataaka Jeʼwaa Moisés sünain niyalerüin nunuʼuse saaʼu tü palaa ishosükat. Maʼaka piʼrüin suluʼu tü ayaakuaakat, nnojoluipa tü wopukot pasanainpünaa sünain tü palaakat, eitaasü süchikuaʼa tü palaakat naaʼu na egipciokana otta tü neʼejenakat. Ouktaka naya napüshuaʼa.

¡Talatüshii maʼin na israeliitakana süka katüin noʼu! Eeʼirajüshii na tooloyuukana nümüin Jeʼwaa, namaka: ‹Akanajuushii na egipciokana nutuma Jeʼwaa. Wüinsitshii naya otta tü naʼamainkat›. Míriam, tü nuwalakat Moisés ayonnajüsü, atalejüsü otta eeʼirajüsü nümüin Jeʼwaa, nashataka shia na wanee jieyuukana, namaka: ‹Akanajuushii na egipciokana nutuma Jeʼwaa. Wüinsitshii naya otta tü naʼamainkat›.