TAN-AWA ang nagakatabu! Si Moises ina nga nagauntay sang iya sungkod sa Dagat nga Pula. Upod sa iya amo ang mga Israelinhon. Apang si Paraon kag ang tanan niya nga hangaway nagakalumos sa dagat. Tan-awon ta kon paano ini natabu.

Subong aton naton-an, ang mga Israelinhon nakagua sa Egipto sa tapos sang ika-10 nga kalalat-an. Mga 600,000 ka Israelinhon nga lalaki ang naghalin, subong man kadamu nga babae kag kabataan. Madamu pa ang nag-upod sa ila nga nagtuo kay Jehova. Gindala nila ang tanan nila nga karnero kag kanding kag baka.

Hinadlokan gid ang mga Egiptohanon sa katapusan nga kalalat-an. Gani ginhatagan nila ang mga Israelinhon sing madamung panapton kag mga butang nga human sa bulawan kag pilak sa wala pa sila makalakat.

Pagligad sang pila ka adlaw, ang mga Israelinhon nag-abot sa Dagat nga Pula. Nagpahuway sila didto. Samtang, si Paraon kag ang iya tinao naghinulsol nga ginpalakat nila ang ila mga ulipon. Gani nagbaylo liwat ang hunahona ni Paraon, kag ang iya hangaway naglagas sa mga Israelinhon.

Sang makita sang mga Israelinhon si Paraon kag ang iya hangaway nga nagapadulong, hinadlokan gid sila. Apang si Jehova nagbutang sing panganod sa ulot sang iya kataohan kag sang mga Egiptohanon. Ang mga Egiptohanon indi makakita sa mga Israelinhon sa pagsalakay sa ila.

Nian ginsilingan ni Jehova si Moises nga untayon ang iya sungkod sa Dagat nga Pula. Sang ginhimu niya, ginpahuyop ni Jehova ang mabaskog nga hangin sa sidlangan. Ang tubig naghawa kag nagpunong sa duha ka kilid.

Nian ang mga Israelinhon nagmartsa paagi sa dagat padulong sa mamala nga duta. Naghinguyang sila sing inoras agod makatabok sila tanan. Sang ulihi nakita sang mga Egiptohanon ang mga Israelinhon. Ang ila mga ulipon nagapalayo! Gani nagdalidali sila sa tunga sang dagat sa paglagaw sa ila.

Nian, ginpalos sang Dios ang mga rueda sang ila mga kangga. Hinadlokan ang mga Egiptohanon, kag nasayasat nila nga si Jehova nagapakig-away para sa mga Israelinhon batok sa ila. Apang ulihi na.

Sa tion ini sang ginsilingan ni Jehova si Moises nga untayon ang iya sungkod sa ibabaw sang Dagat nga Pula, subong makita mo sa laragway. Nian, ang pader nga tubig nag-uli kag nagtabon sa mga Egiptohanon. Ang bug-os nga hangaway nagsunod sa mga Israelinhon sa tunga sang dagat. Wala sing isa ka Egiptohanon ang nakatakas nga buhi!

Daw ano ka malipayon ang tanan nga kataohan sang Dios nga naluas sila! Ang mga lalaki nag-amba: ‘Si Jehova nagdaug sing mahimayaon nga kadalag-an. Gintagbong niya sa dagat ang mga kabayo kag ang ila manugsakay.’ Ang utod nga babae ni Moises nga si Miriam kag ang tanan nga babae nagsaot sing malipayon nga may pandarita. Samtang nagasaot sila nag-amba sila sing pareho nga ambahanon: ‘Si Jehova nagdaug sing mahimayaon nga kadalag-an. Gintagbong niya sa dagat ang mga kabayo kag ang ila manugsakay.