Omakondero wOmurongawotuu
EHUNGI 33
Omakondero wOmurongawotuu
TARA ku imbi mbi mavi tjitwa mba! Ingo oMoses ngwa roporora okati ke kombanda yOmurongawotuu. Imba mbe ri mondjeverero pu na ye munda imbo owarwe Ovaisrael. Nungwari Farao novarwe ve wovita mave ṋiṋiwa momuronga. Indjo tu tare kutja pe ya vi imbi vi tjitwe.
Otja tji twe rihongere, Farao wa raera Ovaisrael okupita moEngipte kombunda yaindu Mukuru tja etere otjiwonga otjitjamurongo kombanda yOvaengipte. Pa tjinda ovarumendu Ovaisrael ape 600 000, na wina novakazendu novanatje ovengi. Opo pa ri otjivarero otjingi tjovandu varwe wina, mba rira ovakarere vaJehova, mba ya puna Ovaisrael. Owo avehe va twaerera ozonḓu zawo nozongombo nozongombe.
Ngunda ave hi ya tjinda, Ovaisrael va ningira Ovaengipte ozombanda noviṋa mbya ungurirwe pongoldo nosilveri. Ovaengipte va ri nemuma tjinene mena rotjiwonga otjisenina tji tje ere ku wo. Okutja owo va yandja oviṋa avihe Ovaisrael mbi va ningirire.
Kombunda yomayuva omaṱiṱi Ovaisrael ve ya pOmurongawotuu. Imbo owo va suva. Moruveze ndwo, Farao novandu ve va uta okurivera kutja owo va yandjerera tjike Ovaisrael okuyenda. Owo va tjere: ‘Twa yandjera ovakarere vetu okuyenda!’
Farao wa rundurura ouripura we rukwao. Eye wa rongerisa etemba re rovita novarwe ve. Okutja eye wa tezera Ovaisrael nomatemba wovita 600 nomatemba omengi yarwe ayehe yaEngipte.
Indu Ovaisrael tji va muna kutja Farao novarwe ve mave ve kongorere, owo va urumine tjinene nu kava ri nokoṋa ku mave taurire. Omurongawotuu wa ri munda umwe wawo, nu munda mbwi owarwe Ovaengipte tjandje ve ya. Nungwari Jehova wa twa po otjikamba pokati kovandu ve nOvaengipte. Okutja Ovaengipte kaave yenene okurwisa Ovaisrael mena rokutja kaave ve yenene okuvemuna.
Okuzambo Jehova wa raera Moses okuroporora okati ke kombanda yOmurongawotuu. Indu tja tjita nao, Jehova a tjiti kutja ombepo onamasa yokomuhuka i pepe. Omeva yomuronga ya haṋwa mokati, nu omeva mominda aviyevari tjandje ya handerwa meyuru.
Nu Ovaisrael va uta okukawondja okukonda omuronga mehi nda kaha. Pa kambura ozoiri kovandu omangete mba novinamuinyo vyawo avihe okukonda hembandina yomuronga nokuhi notjipo. Korusenina Ovaengipte aave yenene okumuna Ovaisrael rukwao. Ovakarere vawo aave i okukaseka! Owo va hakahana nave hiti momuronga okuverambera.
Indu tjiva tjita nao, Mukuru wa tjita kutja omarama womatemba wovita ye hukuke. Ovaengipte va uruma tjinene nu ave utu okuura nave tja: ‘Jehova ma rwire Ovaisrael, ngatu ze po poṋa mba!’ Nungwari tjandje pa kapitwa.
Okutja imba Jehova opa raera Moses okuroporora okati ke kombanda yOmurongawotuu, otja tji wa munu motjiperendero. Nu Moses tja tjita nao, omeva ya uta okukotoka kumwe naye kutjire Ovaengipte nomatemba wawo wovita. Ovarwe vaEngipte avehe va kongorera Ovaisrael momuronga, nu kape na umwe wOvaengipte ngwa hupa!
Ovandu vaMukuru va ri nondjoroka tjiri indu tji va yamwa! Ovarumendu va imbura eimburiro rondangu ku Jehova amave tja: ‘Jehova wa muna ondoṋeno yokombandambanda. Oukambe novakavire we ve yumbu momuronga.’ Omuṱena waMoses, Mirjam, wa toorere otjinangoma tje novakazendu avehe ave mu kongorere novinangoma vyawo. Otja paave pundu nondjoroka, owo va imbura eimbururo otjingero ovarumendu ndi va imburire: ‘Jehova wa muna ondoṋeno yokombandambanda. Oukambe novakavire we ve yumbu momuronga.’
