TAQSIṬ TIS 33

Yeldi webrid di lebḥeṛ

WALI kan acu iḍerrun! Musa yerfed aɛekkaz-​is ɣer lebḥeṛ Azeggaɣ. Imdanen-​agi yellan di ṭṭmana ɣer tama-​s d At Isṛayil. Lameɛna Ferɛun d lɛeskeṛ-​is atnan la ɣerrqen di lebḥeṛ. Amek i d-​yeḍra waya?

Akken i t-​nwala di teqsiṭ iɛeddan, Ferɛun yumeṛ i wat Isṛayil ad ffɣen si tmurt n Maṣer mi tɛedda lmuṣiba tis ɛecṛa. Azal n 600 000 n yergazen i gṛuḥen, bla ma neḥseb tilawin d imecṭaḥ. Ddan diɣen yid-​sen aṭas n lɣaci i gumnen s Yahwa. Akken ma llan wwin lmal-​nsen amecṭuḥ d lmal-​nsen ameqran.

Uqbel ad ṭṭfen abrid, At Isṛayil ssutren i Imaṣriyen llebsa ţ-​ţɣawsiwin yeţwaxedmen s ddheb d lfeṭṭa. Imaṣriyen ikcem-​iten lxuf asmi i tɛedda fell-​asen lmuṣiba tis ɛecṛa. Ɣef waya i fkan i wat Isṛayil ayen akk i sen-​d-​ḍelben.

Mi lḥan kra n wussan, At Isṛayil wwḍen ɣer lebḥeṛ Azeggaɣ. Dinna i sbedden iqiḍunen-​nsen. Lameɛna Ferɛun d yergazen yeddan yid-​es nedmen imi serrḥen i wat Isṛayil. Qqaren: ‘Acu akka i nexdem? Neǧǧa iqeddacen-​nneɣ ad ṛuḥen!’

Ferɛun ibeddel daɣen ṛṛay. Issewjed s lemɣawla akeṛṛus-​is d lɛeskeṛ-​is meṛṛa. Imiren itbeɛ At Isṛayil s 600 ikeṛṛusen itɛeddan akk-​d ikeṛṛusen meṛṛa nniḍen n Maṣer.

Mi refden wat Isṛayil allen-​nsen, walan Ferɛun iteddu-​d neţţa d lɛeskeṛ-​is. Dɣa ugaden, iffeɣ-​iten leɛqel. Ulac amḍiq ɣer wanda ara rewlen. Ɣer zdat iqubel-​iten-​id lebḥeṛ Azeggaɣ, ɣer deffir Imaṣriyen a d-​ţţazzalen ɣur-​sen. Lameɛna Yahwa yesbedd tagut ger wegdud-​is d Imaṣriyen. Akka, Imaṣriyen ur zmiren ara ad walin At Isṛayil akken ad ẓedmen fell-​asen.

Mbeɛd, Yahwa yumeṛ i Musa ad yerfed aɛekkaz-​is ɣer lebḥeṛ. Musa yuɣ awal, dɣa yessker-​ed Yahwa yiwen waḍu iǧehden si ccerq. Aman n lebḥeṛ bḍan ɣef sin, bedden ssya wesya am leṣwar.

Imiren, At Isṛayil bdan leḥḥun di tlemmast n lebḥeṛ ɣef wakal yekkawen. Ilaq ddeqs n sswayeɛ i imelyan n lɣaci d lmal-​nsen meṛṛa akken ad leḥqen di lehna ɣer lǧiha nniḍen. Ɣer taggara, Imaṣriyen uɣalen walan At Isṛayil. Wid yellan d aklan-​nsen atnan regglen! Din din ḍeffren-​ten ɣer tlemmast n lebḥeṛ.

Mi gwala Yahwa belli qerben-​d Imaṣriyen, yeclex ṛṛwaḍi-​nsen. Imaṣriyen ugaden aṭas, dɣa bdan ţsuɣun: ‘Yahwa yeţnaɣ ɣer tama n wat Isṛayil. Tarewla!’ Lameɛna ifut lḥal.

Imiren-​nni i gumeṛ Yahwa i Musa ad yerfed aɛekkaz-​is ɣer lebḥeṛ, akken i t-​teţwaliḍ di ţţeswiṛa-​yagi. Musa yuɣ awal, dɣa leṣwar-​nni n waman ɣlin-​d ɣef Imaṣriyen d ikeṛṛusen-​nsen, ɣummen-​ten meṛṛa. Yuɣ lḥal lɛeskeṛ s lekmal-​is yetbeɛ At Iṣrayil ɣer tlemmast n lebḥeṛ. Tura ula d yiwen seg Imaṣriyen ur yemniɛ!

Acḥal meqqer lfeṛḥ n wegdud n Ṛebbi imi yemneɛ! Irgazen bdan cennun akken ad cekkṛen Yahwa, qqaren: ‘Yahwa yerbeḥ rrbeḥ ameqran. Iḍegger iɛawdiwen d yemnayen-​nsen ɣer tlemmast n lebḥeṛ.’ Meryem, weltma-​s n Musa, teddem-​ed amendayer (ṭṭbel). Tilawin meṛṛa tebɛent-​eţ s imenduyar-​nsent. Bdant ceṭṭḥent s lfeṛḥ, ţɣennint nutenti d yergazen: ‘Yahwa yerbeḥ rrbeḥ ameqran. Iḍegger iɛawdiwen d yemnayen-​nsen ɣer tlemmast n lebḥeṛ.’

Tuffɣa ixef wis 12 alamma d wis 15.