KʼARU yook chi kʼulmank saʼ li eetalil? Laj Moises yook xtiikankil li palaw rikʼin li xcheʼ. Ebʼ laj Israel keʼkoleʼk rikʼin laj Moises. Abʼan, laj Faraon ut ebʼ laj puubʼ yookebʼ chi kamk saʼ haʼ. Qilaq chanru keʼxkʼul aʼin.

Joʼ ak xqatzol, laj Faraon kixkanabʼebʼ chi xik ebʼ laj Israel toj saʼ xlaje li rahilal. Keʼelk chaq Egipto 600.000 tana chi winq ut naabʼal chi ixq ut kokʼal. Joʼkan ajwiʼ naabʼalebʼ laj Egipto keʼelk chaq xbʼaan naq keʼxpaabʼ li Jehobʼa. Keʼrisi chaq ebʼ li xketomq, ebʼ li xkarneer ut ebʼ li xchibʼaat.

Naq ak elkebʼ chaq re laj Israel, keʼxpatzʼ rehebʼ laj Egipto raqʼebʼ, oor ut plaat. Ebʼ laj Egipto keʼxkʼe chixjunil li keʼxpatzʼ ebʼ laj Israel. Xbʼaan naq toj yookebʼ xxiw xbʼaan li xlaje rahilal li keʼxkʼul chaq.

Naq ebʼ laj Israel keʼwulak saʼ li kaqi palaw, keʼok chi hilank. Laj Faraon ut ebʼ laj Egipto yookebʼ xyeebʼal: ‹Kʼaʼut naq xqakanabʼebʼ chi xik ebʼ li qamoos?›

Joʼkan naq laj Faraon ut ebʼ laj puubʼ kohebʼ chirixebʼ laj Israel. Keʼxkʼam 600 li bʼelebʼaal chʼiichʼ li sikʼbʼilebʼ ru, joʼ ajwiʼ chixjunilebʼ li xbʼelebʼaal chʼiichʼ ebʼ laj Egipto.

Kʼajoʼ naq keʼxuwak ebʼ laj Israel naq keʼril ru laj Faraon ut ebʼ laj puubʼ! Keʼxkʼoxla naq maabʼar chik teʼxkol ribʼ, xbʼaan naq chiruhebʼ wank li kaqi palaw ut yookebʼ chaq chi chalk ebʼ laj Egipto. Abʼan li Jehobʼa kixkʼe li choql saʼ xyihebʼ laj Israel ut ebʼ laj Egipto. Joʼkan naq, ebʼ laj Egipto inkʼaʼ chik keʼru chi wulak bʼarwiʼ wankebʼ laj Israel.

Li Jehobʼa kixye re laj Moises: ‹Yeʼ laawuqʼ saʼ xbʼeen li palaw›. Naq laj Moises kixbʼaanu, li Jehobʼa kixtaqla chaq jun li kawil iqʼ ut kixjach ribʼ li palaw.

Chaqi li bʼe naq keʼok chi numeʼk ebʼ laj Israel saʼ xyi li palaw. Abʼan keʼbʼayk chi numeʼk, xbʼaan naq naabʼalebʼ ut naabʼalebʼ ajwiʼ ebʼ li xketomq. Naq ebʼ laj Egipto keʼril wiʼ chik ruhebʼ laj Israel kohebʼ chirixebʼ ut keʼok saʼ li palaw.

Naq ebʼ laj Egipto wankebʼ saʼ li palaw, li Yos kiʼok xjukʼbʼal ebʼ li xbʼelebʼaal chʼiichʼ. Joʼkan naq keʼxuwak ut keʼok xyeebʼal: ‹Li Jehobʼa yook chi yalok qikʼin, saʼ xkʼabʼaʼ li xtenamit. Elenqo saʼ li palaw!› Abʼan inkʼaʼ chik keʼru chi elelik.

Li Jehobʼa kixye re laj Moises naq tixyeʼ li ruqʼ saʼ xbʼeen li palaw, joʼ nakʼutunk saʼ li eetalil. Tojaʼ naq li palaw kisutqʼiik saʼ xnaʼaj ut ebʼ laj Egipto ut ebʼ li xbʼelebʼaal chʼiichʼ keʼmuqunk rubʼel haʼ. Chixjunilebʼ laj puubʼ wankebʼ saʼ li palaw. Maajun rehebʼ kikoleʼk!

Kʼajoʼ naq keʼsahoʼk saʼ xchʼool ebʼ laj Israel! Joʼkan naq ebʼ li winq keʼok chi bʼichank re xbʼanyoxinkil re li Jehobʼa naq keʼkoleʼk: ‹Li Jehobʼa naxnaw yalok. Kixkutebʼ saʼ palaw ebʼ li kawaay ut ebʼ laj puubʼ›. Li xMiriam, ranabʼ laj Moises, kirisi chaq jun li tzojtzoj tun ut ebʼ li rech-ixqilal kohebʼ chirix. Yookebʼ chi xajok ut yookebʼ chi bʼichank ut keʼxye ajwiʼ: ‹Li Jehobʼa naxnaw yalok. Kixkutebʼ saʼ palaw ebʼ li kawaay ut ebʼ laj puubʼ›.