TARORA kũrekĩka atĩa! Ũyũ nĩ Musa atambũrũkĩtie rũthanju rwake igũrũ rĩa Iria Itune. Aarĩa magitĩirũo mwena ũrĩa ũngĩ marĩ nake nĩ Aisiraeli. No ĩndĩ Firauni na mbũtũ ciake ciothe makĩũrĩra iria-inĩ. Reke tuone ũndũ ũyũ wekĩkire atĩa.

Ta ũrĩa twĩrutĩte-rĩ, Firauni eerire Aisiraeli moime Misiri thutha wa Ngai kũrehe ihũra rĩa 10 kũrĩ Amisiri. Ta arũme 600,000 Aisiraeli makiuma, o ũndũ ũmwe na atumia aingĩ na ciana. O na ningĩ, gĩkundi kĩnene kĩa andũ angĩ arĩa maarĩkĩtie gwĩtĩkĩra Jehova, magĩthama hamwe na Aisiraeli. Othe magĩkuua ng’ondu na mbũri na ng’ombe ciao.

Mbere matanathiĩ-rĩ, Aisiraeli makĩhoya Amisiri nguo na indo ingĩ iria ciathondeketwo na thahabu na betha. Amisiri nĩ metigĩrire mũno nĩ ũndũ wa ihũra rĩu rĩa mũthia maareheirũo. Kwoguo makĩhe Aisiraeli kĩndũ o gĩothe metirio.

Thutha wa thikũ nyinyi Aisiraeli magĩkinya Iria-inĩ Itune. Magĩkĩhurũka hau. O ihinda-inĩ rĩu Firauni na andũ ake makĩambĩrĩria kwĩricũkwo atĩ nĩmetĩkĩririe Aisiraeli mathiĩ. Makiuga, ‘Twareka atĩa ngombo ciitũ ithiĩ!’

Kwoguo Firauni akĩgarũrĩra mecirĩa make rita rĩngĩ. O narua akĩhaarĩria makari make na mbũtũ ciake. Rĩu akĩambĩrĩria kũrũmĩrĩra Aisiraeli e na ngari thure 600, o hamwe na ngari ciothe cia Misiri.

Rĩrĩa Aisiraeli monire Firauni na mbũtũ ciake mamoimĩte thutha-rĩ, magĩĩtigĩra mũno. Gũtiarĩ na njĩra ya kũũrĩra. Iria Itune rĩarĩ mwena ũmwe, na rĩu nao Amisiri mokĩte me mwena ũrĩa ũngĩ. Ĩndĩ Jehova agĩgĩkĩra itu gatagatĩ-inĩ ka andũ ake na Amisiri. Kwoguo Amisiri matingĩahotire kuona Aisiraeli nĩguo mamahithũkĩre.

Jehova rĩu akĩĩra Musa atambũrũkie rũthanju rwake igũrũ rĩa Iria Itune. Rĩrĩa eekire ũguo, Jehova agĩtũma rũhuho rũnene ruumĩte mwena wa irathĩro rũhuhũkane. Maĩ ma iria makĩgayũkana, namo maĩ makĩĩhanda ta rũthingo mĩena yerĩ.

Nao Aisiraeli makĩhĩtũkĩra thĩ nyũmũ gatagatĩ-inĩ ka iria. Mamilioni ma andũ o hamwe na nyamũ ciao maatũmĩrire mathaa maingĩ kũhĩtũkĩra iria-inĩ magitĩirũo. Mũthia-inĩ Amisiri nĩ maahotire kuona Aisiraeli rĩngĩ. Rĩu ngombo ciao nĩ ciamatiga! Makĩhanyũka iria-inĩ mamarũmĩrĩre.

Rĩrĩa meekire ũguo-rĩ, Ngai akĩmunyũra magũrũ ma makari mao. Amisiri magĩgĩtigĩra mũno na makĩambĩrĩria gũkaya makiugaga: ‘Jehova nĩwe ũrorĩria Aisiraeli. Nĩtũũrei twehere haha!’ No maarĩ acerere mũno.

Hĩndĩ ĩyo nĩ rĩrĩa Jehova eerire Musa atambũrũkie rũthanju rwake igũrũ rĩa Iria Itune, ta ũrĩa wonire mbica-inĩ. Rĩrĩa ekire ũguo-rĩ, thingo cia maĩ ikĩambĩrĩria gũcokanĩrĩra na igĩthika Amisiri na makari mao. Mbũtũ yothe ya ita nĩ yakoretwo ĩrũmĩrĩire Aisiraeli thĩinĩ wa iria. Gũtirĩ Mũmisiri o na ũmwe watigarire!

Hĩ, kaĩ andũ a Ngai othe nĩ maakenire nĩ kũhonokio-ĩ! Arũme makĩina rwĩmbo rwa gũcokeria Jehova ngatho, makiuga atĩrĩ: ‘Jehova nĩwe njamba ya ita. Nĩ aikĩtie mbarathi na acihaici iria-nĩ.’ Mwarĩ wa nyina na Musa Miriamu akĩoya kĩhembe gĩa kũinio na guoko, nao andũ a nja othe makĩmũrũmĩrĩra me na ihembe ciao. Na ta ũrĩa mainaga na gĩkeno, mainire rwĩmbo o rũrĩa rwainagwo nĩ arũme makiugaga: ‘Jehova nĩwe njamba ya ita. Nĩaikĩtie mbarathi o hamwe na acihaici iria-inĩ.’