TOFAWƆ nyɛ cho yɔŋnɔŋndo wo! Muuse siɛndi koŋ tinda ndɔɔ o Pee Mɛŋma Siaŋaa choo ni. Isɔluɛitiiya sɔla haa kindaa ni ma wa latulu a Muuse o kɔŋgɔɔ pilɔɔ. Kɛ Felo nda wanaa nduaa chɔuwa kpou lo haa o peelo ni. Ŋ nuaŋnuŋndɔ mɛɛ hei looku yɔŋnɔŋ yɛ.

A mɛɛ naŋ laŋga pɛɛku yɛ, mɛɛ kpundɛ tɔɔ hiou Ichiptiaŋnda choo, mi Felo dimul Isɔluɛitiiya le ma faŋaŋ Ichipi. Waŋ piaanduaa Isɔluɛitiiyaa fula Ichipi wa ndaa wa le 600,000. Waŋlaanduaa a chuaambuaa wa vɛlɛ o haa kɔɔli. Nduyɛ mi Ichiptiaŋaa bɔɔ bɔɔ, a laalaŋ o Jɛhowa niŋnda bɛɛ tual Isɔluɛitiiya kɔɔli. Ma kuandu saa ndaa, a chuiŋaa ndaa, vɛlɛa nauwaa ndaa ma kuaŋnuŋ a nda.

Isɔluɛitiiya nyuna fɛŋ Ichiptiaŋnda le nyɛm chuɛyaŋndoŋ, nyɛm nda toosiaa a kooliiyoŋ, vɛlɛa kaniŋ humboŋndoŋ tuupa ma bii nɛiyo. Sioonde wa Ichiptiaŋnda tau a kpundɛ mɛɛlaa komal nda hoo wo. Le sabu koŋ, ma ke Isɔluɛitiiya nyɛ o nyɛ nda nyuna le ndu.

Palɛi biŋgi hiouwɔɔ, mi Isɔluɛitiiya fuuluu o Pee Mɛŋma Siaŋaa. Mɛɛ ma chal pɛŋgioo. O boondii keŋ niŋ mi Felo a puaa nduaa kial suei le mɛɛ nda mal Isɔluɛitiiya ma kuaŋnuŋ yɛ. Ma lo loŋ ma dimi aa: ‘Ŋ mal chiaa naa ma kuaŋnuŋ te!’

Hau pa mi Felo siŋga bɛɛ kɔllo. Mbo chuuŋgiaa puaa nduaa chɔuwa chɔ chɔ vɛlɛa nyɛm nyaanaŋ suaa naŋndoŋ. Ma biyaŋ Isɔluɛitiiya kiltaŋ kɔɔli. Nyɛm nyaanaŋ muŋ wa 600, vɛlɛa ŋ cheleŋndoŋ kpou o lɛŋnde Ichipileŋ niŋ.

Mɛɛ Isɔluɛitiiya che Felo vɛlɛa puaa nduaa chɔuwa hunɔɔ nda kɔɔli, mi sioonde bii nda biyɔɔ pila. Naa ndaa nyaanuŋ ve lɛ le. Pee Mɛŋma Siaŋaa wa nda o baa pilɔɔ, nduyɛ kpeŋgei pilɛi Ichiptiaŋnda wa fulaa loŋ. Kɛ mi Jɛhowa tuisi yumu yumoo Ichiptiaŋnda tɛɛŋ a wanaa nduaa. Mi yumu yumu koŋ tosa Ichiptiaŋnda ndaa nɔla lɛ ma che Isɔluɛitiiya le.

Okoŋ mi Jɛhowa dimul niko Muuse le mbo siɛndi tinda ndɔɔ o Pee Mɛŋma Siaŋaa choo. Mɛɛ o siɛndi tindaa, mi Jɛhowa tosa mi hueiyii bɛnduei fula ba paaleŋ le chaŋndo. Mi i huaŋ hɔŋndo pila. Mi mɛŋndaŋ ma piɔuwaŋ tɛɛŋ, mi ma sim kpeŋgoŋ ŋmuuŋ maa kpaki.

Mɛɛ mɛŋndaŋ ma piɔuwaŋ tɛɛŋ, mi Isɔluɛitiiya kandu kɔlaŋ o lɛŋnde vesɛileŋ choo. Le mi wanaa wa haa o miliɔŋndaŋ niŋ nda taŋ pioo hoo ma hel o kɔŋgɔɔ pilɔɔ, o chua fɛɛŋ teleŋ bɔɔ bɔɔ malaŋ nda taŋ yɛlɛkɛlɛɛ a chɔluaa ndaa. Mɛɛ mi Ichiptiaŋnda nɔla vɛlɛ ma cha Isɔluɛitiiya o mɛɛlulaŋ kpɔŋ. Chiaa ndaa haa wa niŋ kɔndaŋ kɛ kɛ le chiiyo taŋɔɔ. Le hei, mi Ichiptiaŋnda tual a kiltaŋ nda kɔɔli o peelo.

Kɛ nda tolɔɔ dɔɔ, mi Mɛlɛka tosa mi nyɛm nyaanaŋ suaa naŋndoŋ pɔlul kiltaŋ. Mi sioonde kandu Ichiptiaŋnda biyɔɔ tau. Mɛɛ ma mɛliŋ ndaŋ choo kpeleŋ aa: ‘Jɛhowa cho naa chɔulabaa le Isɔluɛitiiya. La ŋ miiŋguŋ amakɔɔ!’ Kɛ ndoo hiou niŋ lɔɔ.

Boondii keŋ kinɛi Jɛhowa dimul vɛlɛ Muuse ni le mbo siɛndi tinda ndɔɔ o Pee Mɛŋma Siaŋaa choo. Nduyɛ mɛɛ Muuse siɛndi ndu, mbɔ kɛ num, mi mɛŋndaŋ ma muuliaŋ Ichiptiaŋnda choo kpou a nyɛm ndaŋ nyaanaŋ suaa naŋndoŋ, a mɛɛ ŋ cho naa chɔɔ o fotueiyo niŋ yɛ. Wanaa chɔuwa o pilɛ bɛɛ ndoo lo le tolɔɔ o peelo le. Nduyɛ Ichiptiaŋaa tol o peelo wa kinɛi, o pilɛ bɛɛ kinda le!

Nyaaloo pila wanaa Mɛlɛkaa dɔunuŋ ni le mɛɛ nda sɔla kindaa yɛ. Mi puaa soli chondei le Jɛhowa balikaa mello, aa: ‘Jɛhowa yem chɔuwo. O diu suaa a wanaa nyaanuŋ a nda wa o mɛŋndaŋ niŋ.’ Mi Meeliaŋ, yemaa Muuse bɛɛ chua nyɛ ndɔ chaa, nduyɛ mi waŋlaanduaa kpou tual ndu kɔɔli a nyɛm ndaŋ chaaŋ. A wa yolaŋ kpeekpei a nyaaloo. Puaa wa chondei chuaa mi waŋlaanduaa bɛɛ saala nda kɔɔli lende kpuu, ma wa solioo diom pilɛ aa: ‘Jɛhowa yem chɔuwo. O diu suaa a wanaa nyaanuŋ a nda wa kpou o mɛŋndaŋ niŋ.’