LOLESYA icilukucitika! Uyu ni Mose ne nkoli yakwe atambicile ukuboko kwakwe peulu pa Cisiba Icikasikile. Abali nakwe mu butende petala lya cisiba bana baIsilaeli. Pano Falo ne bumba lya fita fyakwe kabanwina mu cisiba. Ngatubone ifi ici cabeleko.

Koti nififilya twasambilile, panuma baLesa baletele icincinsya ice kumi mu Ijipiti Falo eli aebele abaIsilaeli ati kamuya mufume mu Ijipiti. Abalalume abaIsilaeli abaile bali cipale 600,000 eli ne banakasi ne bana abengi. Nabambi abengi lukoso abantu, ababele ne bucetekelo muli baYehoba, balile pamo ne baIsilaeli. Bonse kabapinta imbelele syabo ne mbusi eli ne ŋombe pamo nabo.

Ili tabangaya, abaIsilaeli kabalomba ku baIjipiti ifyakufwala ne fintu ifipangilwe ne silifa ne golide. AbaIjipiti balitiinine, ni pa mulandu wa cincinsya ca kupelako icali pali bo. Nabo balibapele fyonse ifi abaIsilaeli balombele.

Panuma yakwenda insiku sinini kabafika ku Cisiba Icikasikile. Kulya eko batusisye. Pa mpindi lukoso inini, Falo ne balalume bakwe balyumfwilo’bubi pa kuleka abaIsilaeli ukuya. Eli bangalabila ati: ‘Twaleka abasya besu ukuya!’

Naye Falo kaalula ilangulusi lyakwe. Kaendesya ukunine’ngolofwana yakwe ne kupekanya ifita fyakwe ifya nkondo. Katatika ne kubalonda abaIsilaeli ne ngolofwana 600 isilibelele, pamo ne ngolofwana simbi isya mu Ijipiti.

Ili abaIsilaeli babwene Falo ne fita fyakwe balukubalonda, balitiinine ukwakuti. Takwali ukwa kubutukila. Uku kumbi kwali Icisiba Icikasikile eli uku kwalukwisa abaIjipiti. Pano baYehoba kababika ikumbi pakati ka bantu babo ne baIjipiti. AbaIjipiti tabalukubabonapo abaIsilaeli ati babekate.

BaYehoba balyebele Mose ukutambika inkoli yakwe peulu lya Cisiba Icikasikile. Ili atambikile, baYehoba kabaleka icipuupu icikulu ica kumutulesuba ukupuupa. Lomba amenda alilekene pabili, ne menda alibele miciliko kubili.

Popele abaIsilaeli balingile pakati pe siba apomine. Palipitile impindi iikulu pakuti amamilyoni abantu ne nama baabuke mu butende pa cisiba. Mukupelako abaIjipiti balitatikile ukubona abaIsilaeli nakabili. Abasya babo baya! Babutukilamo mu cisiba mu kubabutusya.

Ili baingile pa cisiba, baLesa balifumisye amawilo ya ngolofwana syabo. Lomba abaIjipiti balitiinine ne kutatika ukulile’misowa ati: ‘Ni baYehoba balukubalwila abaIsilaeli ne kutucicila. Twendeni tufumemo muno mu cisiba!’ Pano cali kucelwa.

Eli baYehoba balabile kuli Mose ukutambike’nkoli yakwe peulu lya Cisiba Icikasikile, koti nififilya wacibona mu cikope. Ili Mose acitile’fyo, amenda alibwelele ne kwibisya ingolofwana ne baIjipiti bonse. Ibumba lyonse ilya fita lyalikonkele abaIsilaeli pa cisiba. Pe bumbe’lyo ilya baIjipiti tapasyelepo neli umo umulabi!

Mame’fi basangalele abantu ba baLesa pa kubapulusya ee! Abalalume kababembila ulwimbo lwa kubatota baYehoba, kababembila’ti: ‘BaYehoba bacimfya abalwani babo. Kafwalo ne wakwendelapo bali babaposa mu cisiba.’ Eli Milyami inkasi yakwe Mose abulile akaoma kakwe, ne banakasi bonse nabo balifumine ku kumulonda ne tuoma. Pano ili balukusyana mu kusangalala, balukwimba lwenka lulya ulwimbo abalalume balukwimba: ‘BaYehoba bacimfya abalwani babo. Kafwalo ne wakwendelapo bali babaposa mu cisiba.’

Ifyakufuma ifyapitala 12 ukufika ku 15.