TALA bipita pano! Uno’u i Mosesa olwedile mukombo wandi pa Kalunga Katyila. Bano bapandile badi nabo uno mutamba i Bene Isalela. Ino Felo ne bibumbo byandi byonso abalobela mu kalunga ka mema. Tutalei mokyāikadile.

Enka na motwefundile, Felo wānene Bene Isalela bafunduke mu Edipito pa kupwa kwa Leza kwibaletela kipupo kya 10. Bana-balume Bene Isalela kubwipi kwa 600 000 bātambile ne bakaji ne bana bavule. Kadi, kibalwa kikatampe kya bantu bakwabo, bāitabije mudi Yehova, bātaluka pamo na Isalela. Nabo bāselele mikōko yabo ne bambuji ne bañombe bene.

Kumeso kwa kutaluka, Bene Isalela bālombele Bene Edipito bebape bisandi ne bintu bya ndalama ne bya nsahabu. Bene Edipito bākwetwe moyo mpata pangala pa kipupo kya mfulo kyēbaponene. O mwanda bāpele Bene Isalela kyonso kyobēbalombele.

Mafuku matyetye, Bene Isalela bāfika ku Kalunga Katyila. Bakōkolokwa konka. Ponka’po, Felo ne bantu bandi bāshilula kutompola kyobapangila Bene Isalela. Kēbanena’mba: ‘Tubaleka’tu betu bapika bende!’

Felo wāalamuna milangwe monka. Bukidi bonka wālongolola makalo andi ne basola. Penepa, wākalonda Bene Isalela na makalo a pa bula 600, kadi ne makalo onso makwabo a Edipito.

Bene Isalela pa kumona Felo ne bibumbo byandi bebalonda, bākwatwa moyo bininge. Kekwādipo kwa kunyemena. Kalunga Katyila kajike kobenda, kunyuma nako Bene Edipito bāya bebalonda. Ino Yehova wābikile dikumbi pa bukata bwa bantu bandi ne Bene Edipito. O mwanda Bene Edipito kebāmwenepo mwa kwibatambila bulwi.

Kupwa Yehova kānena Mosesa olole mukombo wandi pa Kalunga Katyila. Aye pakolola’o, Yehova wātuma luvula lwa kutunduka lupukume. Mema a kalunga akalañana bwa lubumbu koku ne koku.

Kupwa Bene Isalela bāenda panshi pōmu mu dijiba. Kyalombele kitatyi kivule pa kusaka midiyo ya bantu pamo ne banyema bābuke senene bukila bukwabo. Ku mfulo Bene Edipito bāmona monka Bene Isalela. Bapika babo bādi benda bebanyema! Penepa, lubilo lonka bātwela umbukata mwa kalunga, kebebalonda.

Pobātwelele, Leza wākonkola matonto a ku makalo abo. Bene Edipito bāzakala bininge ne kwela ñanji’mba: ‘Yehova webalwila Bene Isalela. Tunyemei muno!’ Ino kyaba kyādi ke kipite.

Ponka’po Yehova wānena Mosesa olole mukombo wandi pa Kalunga Katyila, enka na momwena pano pa kifwatulo’ki. Mosesa pa kolola mukombo, lubumbu lwa mema lwāpomoka, mema āalukila monka moādi ekadile ne kulobeja Bene Edipito ne makalo abo. Bibumbo byonso byālondele Isalela byāfwa mu kalunga ka mema. Kekudipo Mwine Edipito nansha umo wāpandile!

Bantu ba Leza bāsepelele kashā pa kupanda! Bana-balume bāimba lwimbo lwa kufwija’ko Yehova’mba: ‘Yehova watambula bushindañani bwa ntumbo. Wāela tubalwe ne batentamine’po mu kalunga ka mema.’ Midiamu, kaka wa Mosesa wāyata luyamba, ne bana-bakaji bonso bāmulonda ne mayamba abo. Abo bonso kebaji na nsangaji, bemba lwimbo lonka lwādi lwimba bana-balume’mba: ‘Yehova watambula bushindañani bwa ntumbo. Wāela tubalwe ne batentamine’po mu kalunga ka mema.’