Chihande 33

Navazauka Kalungalwiji Uchila

TALA vili nakusoloka hano! Uze nolola mukombo helu lyaKalungalwiji Uchila ikiye Mose. Vaze ali navo vavatonyi musali vaIsalele. Oloze Fwalo navatu jenyi vaka-kwasa jita vali nakuvomba mukalungalwiji. Tuchitalenu muchapwile.

Nge mutunalinangula, Fwalo asuwile vaIsalele kufuma muEjipitu hakukuma chachipupu chamulikumi anehele Kalunga hali vaEjipitu. Kwakatukile malunga vavaIsalele vakuheta kafwe ku 600,000, kaha namapwevo navana vavavulu. Hapwile navatu veka vavavulu vetavile muli Yehova, vayile navaIsalele. Vosena vambachile mikoko navapembe navangombe javo.

Hakuya, vaIsalele valombele uvwalo navyuma vyakutenga naulu napalata kuli vaEjipitu. VaEjipitu vevwile woma hachipupu chausula chize chavawanyine. Ngocho vahanyine vaIsalele vyosena vavalombele.

Hamakumbi amandende vaIsalele vahetele kuKalungalwiji Uchila. Vatwamine nakunoka. Halwola kanelu, Fwalo navatu jenyi valiveyele hakusuula vaIsalele. Ngwavo: ‘Tunasuwula vandungo jetu vayenga!’

Fwalo alumwine cheka muchima wenyi. Alongesele litemba lyenyi navaka-kwasa jita. Kaha vaputukile kuvakava vaIsalele namatemba avaEjipitu aze akulipwila 600, naeka akwavo osena.

Omu vaIsalele vamwene Fwalo navaka-kwasa jita vali nakuvakava, vachikimine chikuma. Kakwapwile noku kwakuchinyinako. Kulutwe kwapwile Kalungalwiji Uchila, kunyima kukikoze kwapwile nakwijilila vaEjipitu. Oloze Yehova ahakile livwi mukachi kavatu jenyi navaEjipitu. Ngocho vaEjipitu kavamwene vaIsalele numba vavakwateko.

Yehova alwezele Mose olole mukombo helu lyaKalungalwiji Uchila. Hakulinga ngocho, Yehova ahuhwishile peho yayinene kufuma kumusamuko. Meya alihandunwine nakwimana kujisali josena jivali.

VaIsalele vazaukile kalungalwiji hamavu akuma. Hahichile jola jajivulu numba vatu jimiliyoni navimuna javo vakume kuzauka musali yakalungalwiji. Hakikonyi vaEjipitu vahashile kuvamona vaIsalele cheka. Vandungo javo vaze navaya! Vengilile mukalungalwiji nakuvakavangiza.

Omu vengilile mukalungalwiji, Kalunga asokwele mafumbo amatembavo. VaEjipitu vachikimine nakutambakana ngwavo: ‘Yehova ali nakuvashila jita vaIsalele nayetu. Tuchinenumo!’ Oloze vakotokelele.

Yehova alwezele jino Mose olole mukombo haKalungalwiji Uchila, nge muze wamonanga hamuvwimbimbi. Mose hakulinga ngocho, jimbango jameya jakindulukile nakujimika vaEjipitu namatembavo. Vaka-kwasa jita vosena ava, vakavilenga vaIsalele mukalungalwiji. Ngocho kakwapwile kaEjipitu ayovokeleko!

Ocho kuwaha kana vevwile vatu jaKalunga hakuyovoka! Malunga vembile mwaso wakwalisa Yehova, ngwavo: ‘Yehova nafungulula jita yayinene. Najimika vatu natuvalu mukalungalwiji.’ Yaya yaMose Milyame ambachile kangoma kenyi, kaha mapwevo vosena vamukavile natungoma twavo. Vakinyine nakuwahilila, oku vanakwimba mwaso vembilenga malunga ngwavo: ‘Yehova nafungulula jita yayinene. Najimika vatu natuvalu mukalungalwiji.’

Kulovoka tupetulu 12 swi naku 15.