MPANJI 33

Kwawuka Kaluñalwiji Kachinana

TALAÑA chuma chinakumwekana! Iwu diyi Mosi wunolweli mbwechi yindi Hakaluñalwiji Kachinana. Awa adi nindi kukabadi kekwawu anapuluki diwu aIsarela. Ilaña Fwaro niamashidika indi anajiyi mukaluñalwiji. Tutalenu chichadiña.

Neyi chitwadizili, Fwaro walejeli aIsarela kufuma muEjipitu hanyima yakwila Nzambi naleti dehi chipupu cha 10 hadi eniEjipitu. Amayala akushika ku 600,000 aIsarela afumini muEjipitu hamu nawambanda nianyana amavulu. Kwadiña cheñi izaza dawantu amakwawu akuhweleli mudi Yehova niwena afumini hamu naweni Isarela muEjipitu. Wejima wawu asendeli nyikoku yawu niampembi niañombi.

Henohu kanda afumi muEjipitu, aIsarela ayilombeli eniEjipitu yikovwelu niyuma yakwila nawuru nisiliva. EniEjipitu atiyili woma nankashi muloña wachipupu chakukumishaku. Dichi ayinkeli aIsarela yuma yejima yalombeliwu.

Mwahitili hohu mafuku antesha aIsarela ashikili kuKaluñalwiji Kachinana. Anookeleli kweniku. Hampinji yoyimu, Fwaro nawantu jindi aneñeli nawu analeki aIsarela nakuya. Ahosheli nawu, ‘Tunayileki anduñu jetu aIsarela ayi!’

Dichi Fwaro wahimpili maanindi cheñi. Waloñesheli ikalu dindi danjita nimashidika indi. Kutwala muna watachikili kuyilondela aIsarela munyima namakalu 600 adimena nimakalu amakwawu ejima amuEjipitu.

A Isarela chamweniwu Fwaro nimashidika indi anakwinza kwadiñawu, atiyili woma nankashi. Hikwadiñi iluña dakutemukilaku. Kabadi kamu kwadiña Kaluñalwiji Kachinana, kabadi kekwawu dikwenjilileñawu eniEjipitu. Ilaña Yehova wenkeli ivu hakachi kawantu jindi naweniEjipitu. EniEjipitu hiyatwesheli kuyimona aIsarela kulonda ayilukukiku.

Kutwala muna Yehova walejeli Mosi kolola mbwechi yindi haKaluñalwiji Kachinana. Cholweliyi Mosi mbwechi yindi, Yehova welishili mpepela yañovu yakumusela kukunka. Menji amukaluñalwiji ambukili, nawa menji ayimikili kutubadi twejima.

Dichi aIsarela atachikili kwenda mukaluñalwiji hamaseki awuma. Chasendeli mpinji hakwila nawu yihita yawantu niayimuna azambuki chiwahi kwishinadi dakaluñalwiji. Nkumininaku eniEjipitu atwesheli cheñi kuyimona aIsarela. Anduñu jawu ayileña! Dichi anyakeli nakuyilondela mukachi kakaluñalwiji.

Chayilondeleleñawu, Nzambi wakojejeli tufumbu twakumakalu awu kuzokoka. EniEjipitu atiyili woma nankashi nawa atachikili kubilela nawu: ‘Yehova nakuyilwila aIsarela. Tufumenumu!’ Ilaña kwadiña hikulaba kwakweni.

Iyi diyi mpinji yamulejeliwu Mosi kudi Yehova kolola chikasa chindi haKaluñalwiji Kachinana, neyi chiwamona hamwevulu. Nawa Mosi cholweliyi, mbañu jamenji jatachikili kufunta nakuyibuta eniEjipitu nimakalu awu. Mashidika ejima ayilondeleli aIsarela mukachi kakaluñalwiji. Kwosi niwumu wahandili hadi eniEjipituku!

Owu muzañalu wadiña nawantu jaNzambi hakuyipulwisha! Amayala embili kamina kakumusakilila nachu Yehova nawu: ‘Yehova nemiki mushindu wabadika. Nituwalu niakakwendahu nayumbili mukaluñalwiji.’ Muhela Mosi Miriyami wanoneli ndimba yindi, niambanda ejima amulondeleleli nandimba jawu. Nawa chadiñawu nakuhañana namuzañalu, adiña nakwimba kamina kokamu kadiñawu nakwimbawu amayala nawu: ‘Yehova nemiki mushindu wabadika. Nituwalu niakakwendahu nayumbili mukaluñalwiji.’

Kwidika kapetulu 12 nakushika ku 15.