ENGE lo thleng hi en teh. Tuipui Sen chunga tiang lek hi Mosia a ni. Ral lehlama him taka a hnena awmte hi Israel-mite an ni. Mahse Pharaoa leh a sipai rual zawng zawng chu tuipuiah an tla a. Chu chu a lo nih dan i en ang u.

Kan hriat tawh angin Aigupta-mite chungah Pathianin hri 10-na a thlentir hnuah Aigupta chhuahsan turin Pharaoan Israel-mite a hrilh a. Hmeichhia leh naupang tam tak nen Israel-mi mipa 600,000 vel an kal chhuak a. Jehova ringtu rawn ni ve ta mi dang tam tak pawh Israel-mite rualin an chhuak bawk a. An beram leh kelte leh ran rual an hruai theuh bawk a.

An chhuah hmain Israel-miten Aigupta-mite hnenah silhfen leh tangkarua leh rangkachaka siam thilte an ngen a. Aigupta mite chuan an chunga hri hnuhnung ber avang chuan an hlau em em a. Chuvangin an ngen thil tinreng Israel-mite chu an pe a.

Ni tlem te hnuah Israel-mite chuan Tuipui Sen an thleng a. Chutah chuan an chawl a. Chutih chhung chuan Pharaoa leh a mite chuan Israel-mite an kal botir chu pawi an ti tan ta a. ‘Kan bawihte kan kaltir ta si,’ an ti a.

Tichuan Pharaoan a rilru a thlak leh pek a. Rang takin a raldona tawlailir leh sipai ruai a inpeihtir a. Tichuan indona tawlailir bik 600 leh Aigupta tawlailir dang nen Israel-mite an um ta a.

Israel-miten an hnunga Pharaoa leh a sipai rual lo kal an hmuhin, an hlau em em a. Tlan bona kawng a awm si lo va. An sir lehlamah chuan Tuipui Sen a awm a, hei lehlam atangin Aigupta-mite an lo kal si. Mahse Jehovan a mite leh Aigupta mite inkarah chhum a dah a. Chuvangin Aigupta-mite chuan beih turin Israel-mite chu an hmu thei lo va.

Tuipui Sen chunga a tiang lek turin Jehovan Mosia a hrilh a. A lek veleh, Jehovan khawchhak thli na deuh a tlehtir a. Tuipuia tuite chu a inthen a, tuite chu lehlam lehlama chelh din an ni a.

Tichuan Israel-mite chu lei hulah tuipui chu an kal kai tan ta a. Ran zawng zawng nen mi maktaduai tam tak him taka ral lehlam an kal kai nan darkar tam tak a ngai a. A tawpah, Aigupta-mite chuan Israel-mite chu an hmu thei leh ta a. An bawihte an kal bo mek ta! Chuvangin anmahni umin tuipuiah an tlan lut a.

An tlan luh veleh an tawlailir kete Pathianin a tithlawn a. Aigupta-mite chuan an hlau ta em em a: ‘Israel-mite lamah Jehova a tang a ni. Heta ta hi i chhuak ang u!’ tiin an au ta a. Mahse a tlai lutuk ta.

Chu chu Tuipui Sen chunga a tlang lek tura Jehovan Mosia a hrilh lai chu a ni, milema i hmuh ang hian. Mosian a lek veleh, tui bangte chu an chim a. Sipai ruai zawng zawngin tuipuiah Israel-mite an zui lut tawh a. Aigupta mi pakhat mah damin an chhuak lo.

Pathian mipuite zawng zawng chhandam an ni chu an va hlim em! Mipate chuan: ‘Jehovan hnehna ropui a hneh ta. Sakawrte leh an chungchuangte tuipuiah a paih lut ta,’ tiin, Jehova hnenah fakna hla an sa a. Mosia farnu Miriami chuan a darbenthek a la a, hmeichhia zawng zawngin an darbenthek nen an zui a. Lawma an lam pahin, mipaten chu hla bawk chu an sa a. ‘Jehovan hnehna ropui a hneh ta. Sakawrte leh an chungchuangte tuipuiah a paih lut ta,’ tih hi an sa a.