¡KEʼYINKA tiʼ nbʼaj tzalu! Aju nxi tnuqpiʼn tqʼobʼ tukʼe ttzeʼ tibʼaj mar Rojo, atzun Moisésjo. Aqeju xjal ateʼ tukʼil aʼyetzun aj Israelju. Atzun te Faraón kyukʼex tsoldad luqe chʼixtl kyxi mulqʼaj tjaqʼ aʼ. Qo xnaqʼtzan tiʼj tiquʼn bʼaj jlu.

Ik tzeʼnj ma tzʼel qnikʼ tiʼj, tbʼajlenxi tlajajin kʼixbʼisabʼil xi tqʼamaʼn Faraón kye aj Israel tuʼn kyex toj Egipto. I etz chʼixme 600.000 xinaq te aj Israel, ax ikx i etz nim xuʼj ex kʼwaʼl. Nya oʼkxju, ax ikx e etz nimtl xjal aʼyejo otaq tzʼok qʼuqeʼ kykʼuʼj tiʼj Jehová. Kykyaqil qe jlu etz kyiʼn ky-rit ax ikx kychip (kychiv) ex kywakiẍ.

Xi kyqanin aj Israel xbʼalin ex tiʼchaq bʼinchan tukʼe qʼan pwaq ex saq pwaq kye aj Egipto, tej chʼixtaq kyetz. Nim e jaw xobʼ aj Egipto, tuʼnjo tlajajin kʼixbʼisabʼil tzaj kyibʼaj. Tuʼntzunjo, xi kyqʼoʼn tkyaqiljo xi kyqanin aj Israel kye.

Tikʼlenxe jteʼtl qʼij e pon aj Israel tuj mar Rojo. E ajlan atztzu. Ultzuntl toj tkʼuʼj Faraón kyukʼe t-xjalel tiquʼn otaq chi ex kytzaqpiʼn aj Israel. ‹¿Tzaʼn tten ma txi qqʼoʼn ambʼil kye qmajen tuʼn kyex?› Che chi.

Chʼixpuj juntl maj t-xim Faraón. Tuʼntzunjo, kubʼ tbʼinchen tten kyukʼe tkarro ex qe tsoldad. Xitzun lepe kyiʼj aj Israel kyukʼe 600 kar te qʼojbʼel, ax ikx xi kyiʼn txqantl karro te Egipto.

Tej kylonte aj Israel lepchitz Faraón kyukʼe tsoldad kyiʼj, e tzaj xobʼxix. Tuʼnjo mitiʼtaq jatumel tuʼn kyxiʼ. Toj jun plaj tokteq mar Rojo, atzun tuj juntl plaj ateʼtoqtl aj Egipto. Atzunte Jehová kubʼ tqʼoʼn muj kyxol. Tuʼntzunjo, mitiʼtl kyil, moqa mitiʼtl kylom, aj Egipto qe aj Israel tuʼn kyqʼojen kyiʼj.

Xi tqʼamaʼn Jehová te Moisés tuʼn tjaw tiʼn tqʼabʼ tukʼe ttzeʼ tibʼaj mar. Tej tbʼant jlu tuʼn Moisés, tzaj nim kyqʼiqʼ tuʼn Jehová toj tjawitz qʼij (okni). Kubʼ tpaʼn tibʼ aʼ, ex e kyaj weʼ qejo kabʼe plaj aʼ.

E ikʼxtzen bʼet aj Israel tuj tzqij txʼotxʼ toj mar. Xi tiʼn nim ambʼil tuʼn kyikʼx qeju nimxix xjal lu kyukʼix kykyaqil kyalun jlajxi. Kyil juntl maj aj Egipto qe aj Israel, ex e okx lepe kyiʼj tuj mar.

Tej kyokx toj mar, el bʼaj t-xiten Dios tyantel kykarro. E tzaj xobʼxix aj Egipto ax ikx e ok ten ẍchʼil ex kyma: ‹¡Qo el oq kywitz aj Israel!, quʼn a Jehová nqʼojle qiʼj tuʼn kypaj›. Mitiʼtl bʼant tuʼn kyajtz meltzʼaj.

Xitzun tmaʼn Jehová te Moisés tuʼn t-xi tnuqpiʼn tqʼobʼ tukʼe ttzeʼ tibʼaj mar Rojo, ik tzeʼnj ma tila, moqa ma tlome, tuj tilbʼilal. Ok tmojbʼan juntl maj tibʼ aʼ, ex bʼiʼx e kyaj mulqʼaj aj Egipto kyukʼe kykar tjaqʼ aʼ. Kykyaqil soldad otaq chi okx toj mar. ¡Ex mijun aj Egipto kyaj itzʼj!

¡Nimxix e tzalaj aj Israel tuʼnjo e klet tuʼn Dios! Xi kybʼitzen qe xinaq, moqa ichin, jun bʼitz te qʼobʼel chjonte te Jehová ex kyqʼma kyjalu: ‹Ma kanbʼan Jehová. Ma chi kux tmulqʼiʼn qe chej tuj mar kyukʼex qejo kyjaxtoq kyibʼaj›. Etz tiʼn Míriam tal tchnabʼ aju pandereta tbʼi ax ikx qejo txqantl xuʼj e ok lepeʼ tiʼj tukʼe kychnabʼ. Ex e ok ten bʼixil, ex bʼitzel: ‹Ma kanbʼan Jehová. Ma chi kux tmulqʼiʼn qe chej tuj mar kyukʼex qejo kyjaxtoq kyibʼaj›, che chi.