TALA vili na ku lingiua aha! Ou noluela mulamu ha Cisali ca ku Tila ikeye Mosesa. Vaze vali ku mukulo ueni vakevo vaIsaleli. Vunoni masualale va Falao vaze vali na ku hungumuka mu mema. Tu ci tale vati viendele.

Ngue muze mu tua lilongesele, Falao ua lekele vaIsaleli ku tuhuka mu Ingito, mu nima ya cipupu ca vu 10 ha vakua Ingito. Konda ya vamala vakua Isaleli va tuhukile mu ingito ya hetele 600.000, kaha na vampuevo na vanike. Kua kele vantu vakuavo va vavengi, vaze va tavele ku lemesa Yehova va ile hamo na vaIsaleli. Va ambatele matanga avo a vampanga na vampembe na vangombe.

Ntsimbu kanda va katuke, vaIsaleli va vundilile vakua Ingito vuzalo na vupite vukuavo vua ku panga na olu na palata. Vakua  Ingito va vuile vuoma vua kama omo lia cipupu ca ku manusuila. Ngeci va hele vaIsaleli viuma viose vi va tondele.

Mu nima ya matangua a andende, va sikulukile ku Cisali ca ku Tila. Mu va ka hetele kuze va tulile mu ku huima. Falao na vantu veni va putukile ku liveya cikuma omo lia ku tavesa vaIsaleli ku ya. Kaha va liveyele nguavo: ‘Na, tua liputuisa vangamba!’

Ngeci Falao ua aluluile naua visinganieka vieni. Ua viukisile vuasi-vuasi matemba eni na masualale veni. Kaha va putukile ku ka va vaIsaleli na matemba 600 a ku lifuila na matemba akuavo ose a mu Ingito.

Omo vaIsaleli va muene Falao na masualale veni va li na ku iza, va vuile vuoma vua kama. Muomu ka va muene kua ku tinina. Ku  lutue kua kele Cisali ca ku Tila, ku nima kua kele na ku iza vakua Ingito. Vunoni Yehova ua hakele liselua ha kati ka vantu veni na vakua Ingito. Ngeci vakua Ingito ka va hasele ku mona vaIsaleli linga va hase ku va takala.

Kaha Yehova ua lekele Mosesa linga oluele mulamu ueni ha Cisali ca ku Tila. Mua lingilemo, Yehova ua nehele luhundzi lua ndzili lua ku vucelo. Ngeci mema a litepele ha kati ngue vivumbe vivali sinia na sinia.

Kaha vaIsaleli va putukile ku zavuka cisali ha livu lia ku uma. Vesualele ku zavuka muomu va puile makulukazi a vantu na tusitu. Yehova ua fumisile liselua, Amba vuose vakua Ingito va hasele naua ku mona vaIsaleli. Va muene vangamba vavo va li na ku ya! Ngeci vakua Ingito va kovelele vuasi-vuasi mu cisali mu ku va kava.

Kaha omo va kovelele, Yehova ua putukile ku zitula vinkuakua via matemba avo. Ngeci vakua Ingito va vuile vuoma vua kama kaha va putukile ku litetela nguavo: ‘Yehova a li na ku luila vantu veni vaIsaleli. Tu tinenu muno!’ Vunoni va kotokelele cikuma.

Haze vene Yehova ua lekele Mosesa linga oluele mulamu ha Cisali ca ku Tila, ngue mu u na muene ha fikula. Mosesa ua lingilemo, ngeci vivumbe via mema via liuanene naua na ku zivilika vakua Ingito na matemba avo. Ku civunga cose ca masualale ca kavele vaIsaleli mu cisali, na umo mukua Ingito ua supulukileho uahi!

Vantu va Njambi va viukilile cikuma mu ku vovola! Vamala vembile miaso ya ku sangaziala Yehova nguavo: ‘Yehova na hiana na vumpahu. Na mbila tuvalu na vakua ku vendela mu cisali.’ Miliame ndumbu ya Mosesa, ua nonele kangoma, kaha vampuevo vose va mu kavele na vingoma viavo. Kaha mu va cinine na ndzolela, vembile muaso umo lika na vamala nguavo: ‘Yehova na hiana na vumpahu. Na mbila tuvalu na vakua ku vendela mu cisali.’