Kipanauijkej ueyiat chichiltik
Tanojnots 33
Kipanauijkej ueyiat chichiltik
¡XIKITA tein mochiujtok! Tein momamelaujtok ika ikuouj itech ueyiat Chichiltik yejua Moisés. Uan tein yetokej ueyiatenoj iuan Moisés yejuan israelitas. Sayoj ika, Faraón uan itateuijkauan moaeltsimijtokej. Maj tikitakan keniuj mochiuak nejin.
Timomachtijkejya ika keman panok majtaktika chauis, Faraón kiniluij israelitas maj kisanij Egipto. Kemej 600,000 takamej israelitas kiskej, ijkon kemej miakej siuamej uan konemej. Uan no miakej taltikpakneminij tein kineltokakej Jiova kiskej imiuan israelitas. Nochin kinkuiteujkej imin ichkauan imin cabras uan okseki tapialmej keman kiskej Egipto.
Achtopa keman kisaskiaj israelitas, kintajtanijkej egipcios taken uan okseki taman tein chijchiujtoya ika oro uan plata. Egipcios motelmoujtijkej keman kinajsik majtaktika chauis. Yejika kinimakakej israelitas nochi tein kintajtanijkej.
Keman panok seki tonalmej, israelitas ajsikej ueyiat Chichiltik, uan ompa moseuijkej. Sayoj ika, Faraón uan itekitikauan peuak moyolkokouaj keyej kinkaujkej maj yanij israelitas. Kijtouayaj: ‘¡Tikinkaujkej maj yakan totekitikauan!’
Ijkoni yej, Faraón oksepa motanemililispatak. Uan niman kikuiteuak icarro tein ika tateuiaya uan itateuijkauan. Uan kinikantokak israelitas ika 600 carros taijitalmej, ijkon kemej nochin okseki carros tein kinpiayaj Egipto.
Keman israelitas kinixajsikej Faraón uan itateuijkauan, motelmoujtijkej. Amo kanaj ueliaj cholouayaj. Taixpan yetoya ueyiat Chichiltik, uan egipcios ualayaj imin ikan. Sayoj ika, Jiova kitalij tatajko se mixti uan ijkon egipcios amo kinitayajok israelitas, uan yejika amo ueliaj kinkitskiayaj.
Satepan, Jiova kiiluij Moisés maj momamelauani ika ikuouj itech ueyiat Chichiltik. Keman momamelauak, Jiova kichiuak maj ualani tonalkisayampa se chikauak ejekat. Ueyiat moxeloj uan nenekakpa motsakuilij kemej tepamit.
Ompa, israelitas peuak panouaj kampa moxeloj at itech se ojti uakik. Tel miak horas kiniuikilij tamipanoskej sentapalika, nejon tel miakej taltikpakneminij iuan imin tapialuan. Satepan egipcios oksepa uelik kinitakej israelitas uan kinikantokakej ueyiaijtik.
Keman ojtokatoyaj, Dios kichiuak maj metsuejueliuinij imin carros. Egipcios motelmoujtijkej uan peuak kijtouaj chikauak: ‘Jiova kinpaleuia israelitas yejika touan moteuia. ¡Maj timokepakan!’ Sayoj ika amo ueliskiaok.
Ompa, Jiova kiiluij Moisés maj momamelauani ika ikuouj itech ueyiat Chichiltik, kemej tikitak itech taixkopin. Uan at tein motsakuilijtoya, oksepa mosentilij uan kinatsonpoloj egipcios uan imin carros. Nochin tateuianij mokalakijkaj ueyiaijtik. ¡Uan niose egipcio mopaleuij!
¡Tel yolpakkej israelitas keman Dios kinimakixtij! Takamej mokuikatijkej uan ika kitasojkamatilijkej Jiova. Kijtojkej: ‘Jiova tatanik itech se ueyi neteuil. Kinixpoloj itech ueyiat caballos uan tein iminpan yayaj’. Míriam, ikniuj Moisés, kikixtij se tepos tatsiliniloni, uan okseki siuamej no ijkon kichiujkej. Mijtotiayaj uan mokuikatijtiayaj: ‘Jiova tatanik itech se ueyi neteuil. Kinixpoloj itech ueyiat caballos uan tein iminpan yayaj’.
